දහස් ගණන් ජීවිතක්ෂයට පත් කළ ගංවතුරෙන් විපතට පත් වූවන්ට උපකාර කිරීම සඳහා එක්සත් අරාබි එමීර් රාජ්‍යය ලිබියාවට මානුෂීය ආධාර ටොන් 622 ක් යවා තිබේ.
එක්සත් අරාබි එමීර් රාජ්‍යය සහ ලිබියාව අතර පිහිටුවා ඇති මානුෂීය ගුවන් පාලමේ කොටසක් වන මෙම ආධාර පවුල් 6,000කට වැඩි පිරිසකට උපකාර කරනු ඇතැයි නිලධරයෝ පැවසූ බව රාජ්‍ය ප්‍රවෘත්ති ඒජන්සිය වාර්තා කළේය.
ජලය එකතැන පල්වීම නිසා ඇතිවන රෝග පැතිරීම වැළැක්වීම සඳහා වෛද්‍ය සහ සෞඛ්‍ය සැපයුම් මෙන්ම අර්බුදයෙන් පීඩාවට පත්වූවන් සඳහා පුද්ගලික සනීපාරක්ෂක සැපයුම් සහ ආහාර මෙම ආධාරයට ඇතුළත් වේ.
ගංවතුරින් හානියට පත් වරාය නගරයක් වන ඩර්නා ඇතුළු දරුණුතම බලපෑමට ලක් වූ ප්‍රදේශවලට ගුවන් යානා 28 කට වැඩි ප්‍රමාණයක් ආධාර බෙදා දී ඇත.
විපතට පත් වූවන්ට උපකාර කිරීම සඳහා Emirates Red Crescent විසින් දියත් කරන ලද සහන වැඩසටහනක කොටසක් ලෙස නවාතැන්, ආහාර, සෞඛ්‍ය සැපයුම් සහ අනෙකුත් අත්‍යාවශ්‍ය ද්‍රව්‍ය දරුණුතම විනාශය අත්විඳින ලද ප්‍රදේශවලට යවන ලදී.
සැප්තැම්බර 10 වන දින හමන ලද සුළි කුණාටුවකට පසු වේලි දෙකක් හරහා ක්ෂණික ගංවතුරක් හට ගැනුන අතර ඩර්නා නගරයේ සිට දහස් ගණනක් මිනිසුන් මුහුදට ගසාගෙන යාමත් සිදුවිය.
කුණාටුවෙන් පැය කිහිපයක් ඇතුළත, එක්සත් අරාබි එමීර් රාජ්‍යයේ ජනාධිපති අතිගරු ෂෙයික් මොහොමඩ් ලිබියාවට හදිසි සහන ආධාර සහ සෝදිසි සහ ගලවා ගැනීමේ කණ්ඩායම් යවන ලෙස නියෝග කළේය.
රාජ්‍ය නිලධාරීන් සහ ආධාර ආයතන වාර්තා කර ඇති ආකාරයට මරණ සංඛ්‍යාව 4,000 සිට 11,000කට වඩා විය හැකි බවත් ගංවතුර පුද්ගලයින් 880,000 කට වැඩි පිරිසකට සෘජුවම බලපා ඇති බවත් එක්සත් ජාතීන්ගේ සංවිධානය වාර්තා කර ඇත.
පසුගිය සතියේ, එක්සත් අරාබි එමීර් රාජ්‍යයේ මානුෂීය නියෝජිත කණ්ඩායම ඩර්නා හි ගංවතුරෙන් විපතට පත් වූවන්ගේ සිරුරු හඳුනා ගැනීමට උපකාර කිරීම සඳහා ආපදා වින්දිතයින් හඳුනාගැනීමේ කණ්ඩායමක් යවා ඇත.
සුන්බුන් වලින් ගොඩගත් හෝ ගංවතුර ජලයෙන් ගොඩගත් විපතට පත් වූවන් හඳුනා ගැනීමේ ක්‍රියාවලිය ආරම්භ කිරීම සඳහා 26 දෙනෙකුගෙන් යුත් එමරාති කණ්ඩායම බ්‍රහස්පතින්දා උපකරණ සහ විශේෂඥයන් සමඟ එහි යවන ලදී.
