වාහන ආනයන තහනම ඉවත් කිරීමත් සමඟ වාහන 3000කට වැඩි සංඛ්‍යාවක් ආනයනයට සැලසුම් කර ඇති බව ශ්‍රී ලංකා වාහන ආනයනකරුවන්ගේ සංගමයේ සභාපති ප්‍රසාද් මානගේ මහතා පැවැසීය.ඒ මහතා මේ බව කියා සිටියේ ජපානයෙන් ආනයනය කරන පළමු වාහන තොගය ඊයේ (27) රාත්‍රී දිවයිනට ළඟාවීම සම්බන්ධයෙන් අදහස් දක්වමිනි.
පළමු වාහන තොගය රැගත් නැව ඊයේ (27) රාත්‍රියේ හම්බන්තොට වරායට ළඟාවන බවත් කී ඒ මහතා නෞකාවේ වාහන 300ක් පමණ පවතින බව කියා සිටියේය. එසේ ජපානයෙන් නව වාහන ආනයනය කරන්නේ, වසර 5කට පසුව වීම විශේෂත්වයක් බව කියා සිටි ඒ මහතා ඒවා ඇණවුම් කළ පුද්ගලයන්ට කඩිනමින් ලබාදීමට සියලු කටයුතු යොදා ඇතැයිද පැවසීය. මේ අතර තායිලන්තයෙන් ආනයනය කළ කැබ් රථ 15ක පමණ තොගයක් මේ වනවිටත් කොළඹ වරායට පැමිණ ඇති බවත් හෙතෙම සඳහන් කළේය.
