මැදපෙරදිග කලාපයේ සිදුකල විශාලතම වෙසක් මංගල්‍යය දැවැන්ත ජන සහභාගිත්වයකින් ඩුබායිහි ශෙයිකා ලතිෆා රෝහල් ක්‍රීඩාංගනයේදී ඊයේ පැවැත්වූවා.
ශ්‍රී ලංකා සංස්කෘතික අධ්‍යාපන කෙන්ද්‍රය සහ ඩුබායිහි ශ්‍රී ලාංකික කලා ආයතනවල දරු දැරියන්ගේ දායකත්වයෙන් පස්වරු 4 ට වෙසක් පෙරහැර ආරම්භ වූ අතර සංස්කෘතික සංදර්ශනය පස්වරු 6.00 ට ආරම්භ වූවා.වෙසක් මංගල්‍යය සඳහා එක්සත් අරාබි එමීර් රාජ්‍යයේ තානාපති ගරු උදය ඉන්ද්‍රරත්න මැතිතුමණ්ද එක්වී සිටියා.
උත්සව භූමියේ අඩි 22 ක් උස දර්ශණීය වෙසක් තොරණ ඇතුලුව ඉතා අලංකාරවත්ව නිමවූ වෙසක් සැරසිලි සහ වෙසක් පහන් කූඩු වලින් බැබැලුණු අතර ඩුබායි ලංකාරාම විහාරස්ථානයේ දායක සභාවේ ශ්‍රම දායකතත්වයෙන් ජනතාවට වන්දනාමාන කිරීමට පන්සලක්ද ඉදිකර තිබීම විශේෂ සිදුවීමකි.
තවද මෙම භූමියේ 17කට ආසන්න දන්සැල් ප්‍රමාණක් සංවිධානය කර තිබු අතර බත් දන්සැලක්, කඩල, පාන්, සිසිල් පැන්, අයිස්ක්‍රීම් වැනි දන්සල්ද දහම් පොත් දන්සැලක්ද ඇතුලත් වූ අතර වසර 4ක නිහැඬියාවකට පසුව පැවති මෙම වෙසක් මංගල්‍යයට අති විශාල ජනතා සහභාගිත්වයක් දක්නට ලැබුනා.
මව් බිමෙන් බැහැරව වෙනත් දේශයකදී ඉතා ඉහලින් සැමරුන මෙම වෙසක් මංගල්‍යයට ශ්‍රී ලංකා කොන්සල් ජනරාල් කාර්යාලයට අනුබද්ධිත, ශ්‍රී ලංකා සංස්කෘතික අධ්‍යාපන කෙන්ද්‍රය, ඩුබායිහි ක්‍රියාත්මක වන සියලුම ශ්‍රී ලාංකික කලා ආයතන, සියලුම ශ්‍රී ලාංකික ස්වෙච්ඡා ආයතන හා සියලුම ශ්‍රී ලාංකික වෘත්තීය සංවිධානවල දායකත්වයෙන් සංවිධානය කොට තිබුණා.
