ඊශ්‍රායලය සහ හමාස් සංවිධානය, ගාසා තීරයේ සටන් විරාමයකට සහ ප්‍රාණ ඇපකරුවන් නිදහස් කිරීමේ ගිවිසුමකට එකඟ වී ඇත. ඒ මාස 15ක යුද්ධයකින් පසුවය. මෙම සාකච්ඡා සඳහා කටාර් සහ අමෙරිකා එක්සත් ජනපදය මැදිහත්කරුවන් ලෙස කටයුතු කළහ.
කටාර් අගමැති ෂෙයික් මොහොමඩ් බින් අබ්දුල් රහ්මාන් අල් තානි පැවසුවේ ගිවිසුම ඊශ්‍රායල කැබිනට් මණ්ඩලය විසින් අනුමත කිරීමෙන් අනතුරුව ඉරිදා සිට බලාත්මක වන බවයි.
මෙම සටන් විරාමය ගාසා තීරයේ සටන් නවත්වන බවත්, පලස්තීන සිවිල් වැසියන්ට අත්‍යවශ්‍ය මානුෂීය ආධාර ලබා දෙන බවත්, ප්‍රාණ ඇපකරුවන් ඔවුන්ගේ පවුල් සමඟ නැවත එක් කරන බවත් අමෙරිකා එක්සත් ජනපද ජනාධිපති ජෝ බයිඩන් පවසා තිබේ.
ගිවිසුමේ අවසන් තොරතුරු තවමත් සකස් වෙමින් පවතින නමුත් එය “ප්‍රවර්ධනය කිරීම” සම්බන්ධයෙන් අමෙරිකානු ජනපති බයිඩන්ට ස්තුතිවන්ත වන බව ඊශ්‍රායල අගමැති බෙන්ජමින් නෙතන්යාහු පවසයි.
මෙලෙස සටන් විරාමයකට එළඹීමට හැකියාව ලැබුණේ පලස්තීන “ප්‍රතිරෝධීතාවයේ” ප්‍රතිඵලයක් නිසා බව හමාස් නායක කලීල් අල්-හයියා පවසා ඇත.
ගාසා තීරයේ සටන් විරාම පුවත සැල්වීමත් සමගම බොහෝ පලස්තීන ජාතිකයන් සහ ඊශ්‍රායල ප්‍රාණ ඇපකරුවන්ගේ පවුල් එකිනෙකා වැළඳගනිමින් එය සමරා තිබේ.
2023 වසරේ ඔක්තෝබර් 7 වන දින හමාස් සංවිධානය කළ පෙර නොවූ විරූ දේශසීමා ප්‍රහාරයක් එල්ල කරමින්, ඊශ්‍රායල වැසියන් 1,200 ක් පමණ ඝාතනය කර, තවත් 251 දෙනෙකු ප්‍රාණ ඇපයට ගත්හ. ඊට ප්‍රතිචාර වශයෙන් අමෙරිකා එක්සත් ජනපදය සහ අනෙකුත් රටවල් විසින් ත්‍රස්තවාදී සංවිධානයක් ලෙස තහනම් කර ඇති හමාස් විනාශ කිරීමේ මෙහෙයුමක් ඊශ්‍රායලය දියත් කළා.
එතැන් සිට ගාසා තීරයේ පුද්ගලයින් 46,700 කට වැඩි පිරිසක් මිය ගොස් ඇති බව එම ප්‍රදේශයේ හමාස් පාලනය කරන සෞඛ්‍ය අමාත්‍යාංශය පවසයි.
