නිෂ්පාදන ආර්ථිකයක් බිහිකිරීමේ රජයේ සංකල්පයට අනුව ප්‍රාදේශීය සංවර්ධන බැංකුව (RDB) ක්‍රියාත්මක කරන, ජාතික ආර්ථිකයට නව ව්‍යවසායකයින් 15 000 ක් එක් කිරීමේ අරමුණින් ක්‍රියාත්මක කරන වැඩසටහනේ නැගෙනහිර පළාත් සමාරම්භක උත්සවය කර්මාන්ත සහ ව්‍යවසායකත්ව සංවර්ධන අමාත්‍යය සුනිල් හඳුන්නෙත්ති මහතාගේ ප්‍රධානත්වයෙන් පසුගියදා (30) මඩකලපුවේදී පැවැත්විණි.
ශ්‍රී ලංකාවේ ප්‍රමුඛතම රාජ්‍ය සංවර්ධන බැංකුව වන ප්‍රාදේශීය සංවර්ධන බැංකුව ග්‍රාමීය ආර්ථිකය නගා සිටුවීම අරමුණු කරගනිමින් ක්ෂුද්‍ර හා සුළු පරිමාණ ව්‍යවසායකයින් බල ගැන්වීම සඳහා වැඩසටහන් රැසක් ක්‍රියාත්මක කරනු ලබයි.
ග්‍රාමසේවා කොට්ඨාශ 14 022 ක් ආවරණය වන පරිදි සෑම ග්‍රාමසේවා කොට්ඨාසයකින්ම අවම වශයෙන් එක් ව්‍යවසායකයෙක් බැගින් නිර්මාණය කිරීම මෙම වැඩසටහනේ මූලික අරමුණ වන අතර ධීවර, කෘෂි, පශු සම්පත්, කර්මාන්ත වැනි විවිධ ක්ෂේත්‍ර නියෝජනය කරමින් කාන්තා සහ තරුණ නව ව්‍යවසායකයින් බිහිකිරීම මෙම වැඩසටහන මගින් බලාපොරොත්තු වේ.
මූල්‍ය ප්‍රතිපාදන ලබාදීමට අමතරව මූල්‍ය පාලනය හා විනය, නවීන තාක්ෂණික ක්‍රම, වෙළඳපළ අවස්ථා, පුහුණු වැඩසටහන් ක්‍රියාත්මක කිරීම වැනි පහසුකම් ද ව්‍යවසායකයින් සඳහා මෙම වැඩසටහන මගින් ලබාදෙනු ලබයි. මෙම වැඩසටහන තුළින් නැගෙනහිර පළාතේ ග්‍රාම සේවා කොට්ඨාශ 150 ක් ආවරණය වන පරිදි රුපියල් මිලියන 300ක ණය ප්‍රදානයක් ලබා දෙන ලදී.
මෙහිදී අදහස් දක්වමින් කර්මාන්ත සහ ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති මහතා, මෙම නව ව්‍යවසායකයින් හට භාණ්ඩ නිෂ්පාදනයේ සිට එම භාණ්ඩ අපනයනය කිරීම දක්වා අඛණ්ඩ සහාය ලබා දීමට කර්මාන්ත අමාත්‍යංශය සූදානම් බවත් ඒ සඳහා ජාතික ව්‍යවසාය සංවර්ධන අධිකාරිය (NEDA), කාර්මික සංවර්ධන මණ්ඩලය (IDB), ජාතික ශිල්ප සභාව, ජාතික මෝස්තර මධ්‍යස්ථානය, ලක්සල, කුඩා කර්මාන්ත සංවර්ධන දෙපාර්තමේන්තුව, අපනයන සංවර්ධන මණ්ඩලය (EDB) වැනි ආයතන රැසක් තම අමාත්‍යංශය යටතේ ක්‍රියාත්මක වන බව පැවසීය.
මෙම අවස්ථාවට ප්‍රාදේශීය සංවර්ධන බැංකුවේ සභාපති ලසන්ත ප්‍රනාන්දු, මඩකලපුව දිස්ත්‍රික් ලේකම් J.J. මුරලිදරන්, පාර්ලිමේන්තු මන්ත්‍රීවරුන්, රාජ්‍ය නිලධාරීන්, ක්ෂුද්‍ර හා සුළු පරිමාණ කර්මාන්තකරුවන් ඇතුළු විශාල පිරිසක් සහභාගි වූහ.
