අධි ආරක්ෂිත කලාපයක් වශයෙන් නම් කොට තිබූ පලාලි පේදුරුතුඩුව මංසන්ධිය දක්වා වූ මාර්ගය වසර 34 කට පසුව අද (10) දින සාමාන්‍ය ජනතාවගේ ගමනගමනය වෙනුවෙන් විවෘත කිරීමට යුද හමුදාව විසින් පියවර ගෙන තිබුණි.
මේ අනුව යාපනය පලාලි ප්‍රධාන මාර්ගයේ පිහිටි වාසවිලාන් මංසන්ධියේ සිට පේදුරුතුඩුව පොන්නාලෙයි මංසන්ධිය දක්වා ඇති කිලෝ මීටර් දෙකහමාරක දුර මාර්ගය අද උදෑසන සිට මහජනතාවට ගමනාගමනය සඳහා විවෘත කිරීමට පලාලි යුදහමුදා කඳවුර විසින් පියවර ගෙන තිබුණි.
මෙම මාර්ගය පලාලි යුදහමුදා කඳවුරේ ඇති අධිආරක්ෂිත කලාපය හරහා ජනතාව ගමන් කරන අතර මාර්ගය විවෘතව තැබීමෙන් ජනතාවගේ ගමනාගමන කටයුතු ඉතා පහසු වෙයි.
කෙසේ වෙතත් විවෘත කරන ලද මාර්ගයේ ගමන් කරන මගීන්ට පිලිපැදිය යුතු කොන්දේසි 07ක් පමණ යුද හමුදාව විසින් දැනුම් දී ඇත. ඒ අනුව,
මාර්ගය විවෘතව පවතින්නේ උදෑසන 6 සිට සවස 5 දක්වා කාලය අතර වේ. විවෘත කරන මාර්ගය අතරමග වාහන නවතා තැබීම තහනම් කිරීම, මාර්ගයේ ගමන්කරන අතරතුර මගදෙපස ඡායාරූප වීඩියෝ ගැනීම තහනම් කිරීම, අදාල මාර්ගය දෙපස ඇවිදීම තහනම් කිරීම, මගී ගමනාගමනය හැර වෙනත් කටයුතු සඳහා මාර්ගය භාවිතා නොකිරීම, මාර්ගයේ ගමන් කරන වාහන වල උපරිම වේගය පැයට කිලෝමීටර් 40 ක වේගයෙන් ගමන් කිරීම, මාර්ගයේ ගමන්කරන අයගේ අනන්‍යතාවය ආරක්ෂක අංශ දැනුවත් කිරීම යනාදි කරුණුය.
අද දින මාර්ගය විවෘත කිරීමත් සමග ජනතාව ඉතා සතුටින් යුතුව මාර්ගය භාවිතා කරමින් මාර්ගයේ ගමනාගමනය සිදුකල අතර ඔවුන් වැඩි දුරටත් පවසා සිටියේ අධිආරක්ෂිත කලාපයන්ට අයත් සෙසු භූමිද මෙලෙසින් නිදහස් කිරීමට ආරක්ෂක අංශ ඇතුලු රජයේ අවධානය යොමු කරන ලෙසටය.
