රැකියාවක් නොමැතිව එක්සත් අරාබි එමීර් රාජ්‍යයේ අතරමංව සිටින ශ්‍රී ලාංකික කාන්තාවන් 40කට වැඩි පිරිසක් නැවත ශ්‍රී ලංකාව වෙත යැවීමට කටයුතු කරමින් සිටී. ඩුබායි හි ශ්‍රී ලංකා කොන්සල් ජනරාල් කාර්යාලය සහ ශ්‍රී ලංකන් එයාර් ලයින්ස් එක්ව ගුවන් ටිකට්පත් සහ ගමන් ලියකියවිලි පහසුකම් සපයා ඔවුන් ශ්‍රී ලංකාව වෙත යැවීමට ඉදිරිපත් වී තිබෙනවා.
මෙම කාන්තාවන් විවිධ හේතූන් මත එක්සත් අරාබි එමීර් රාජ්‍යයේ අතරමංව සිටියහ. ඔවුන්ගෙන් සමහරක් සංචාර වීසා මත එක්සත් අරාබි එමීර් රාජ්‍යයට පැමිණ, රැකියා අවස්ථාවන් සොයමින් සිටියද එවැනි අවස්ථාවක් සොයා ගත නොහැකි වී ඇති අතර ඔවුන්ගේ වීසා බලපත්‍ර කල් ඉකුත් වී ඇත. තවත් සමහරක්, ඔවුන්ගේ රැකියා වීසා බලපත්‍ර කල් ඉකුත් වූ නමුත්, ශ්‍රී ලංකාව වෙත නොගොස් රැඳී සිටි අය වෙයි.
අතරමං වූ මෙම කාන්තාවන් කණ්ඩායම් වශයෙන් ඩුබායි සිට කොළඹට ගුවන් මගින් රැගෙන යනු ලැබේ. එහි පළමු කණ්ඩායම පසුගිය මාසයේ ලංකාවට පිටත් කර හරිනු ලැබුවා.
“අපට මගක් නොපෙනී, බලාපොරොත්තු සුන් වූ බවක් දැනුනි, නමුත් පසුව ශ්‍රී ලංකන් ගුවන් සමාගම සහ ඩුබායිහි කොන්සල් ජනරාල් කාර්යාලය අපට උදව් කිරීමට ඉදිරිපත් වූ අතර, මම ඔවුන්ට සදාකාලිකවම ස්තූතිවන්ත වෙමි. නැවත ශ්‍රී ලංකාවට යාමට ලැබීම ගැන මම සතුටු වෙමි,” එක් කාන්තාවක් පැවසීය.
ඩුබායි හි ශ්‍රී ලංකා කොන්සල් ජනරාල් කාර්යාලයේ කොන්සල් ජනරාල් ඇලෙක්සි ගුණසේකර මහතා මෙසේ පැවසීය. “මෙම කාන්තාවන්ට මව්බිමට යාමට අවස්ථාව සැළසීමත් ඔවුන් මුහුණ දී ඇති අභියෝගවලට විසඳුම් සෙවීමත් අපගේ යුතුකමකි. ගුවන් ගමන් ගාස්තු විශාල අභියෝගයක් වූ අතර ශ්‍රමිකයින් ආපසු ගෙන්වා ගැනීම කඩිනම් කිරීම පිළිබඳව ශ්‍රී ලංකන් ගුවන් සමාගමේ නිලධාරීන්ට මම ස්තූතිවන්ත වෙමි. එය අපේ ජාතික ගුවන් සේවය පෙන්වා දෙන ඉහළම සමාජ වගකීම් මට්ටමයි,”
ශ්‍රී ලංකන් ගුවන් සේවයේ නිලධාරියෙකු පැවසුවේ තම කණ්ඩායම “ජාතියට සහ එහි ජනතාවට සේවය කිරීමට ඇති කැපවීම”තුළ ස්ථිරව සිටින බවයි. “මෙම ශ්‍රී ලාංකිකයින්ට ඔවුන්ගේ ආදරණීයයන් සමඟ නැවත එක්වීමට ආරක්ෂිත සහ ඉතා දැරිය හැකි මාර්ගයක් සැපයීම සඳහා ඩුබායි හි ශ්‍රී ලංකා කොන්සල් ජනරාල් කාර්යාලය සමඟ සහයෝගයෙන් කටයුතු කිරීමට ලැබීම අපට ගෞරවයක්” යැයි ශ්‍රී ලංකන් ගුවන් සේවයේ UAE හි ප්‍රාදේශීය කළමනාකරු ශිරාන් ක්‍රෙට්සර් පැවසීය.
Global Media Insight වාර්තාවන්ට අනුව, එක්සත් අරාබි එමීර් රාජ්‍යයේ මිලියන 9කට අධික ජනගහනයෙන් 3.17%ක් හෙවත් මිලියන 0.32ක් ශ්‍රී ලාංකික පුරවැසියන් වේ. ඔවුන් එමිරේට්ස් හි ප්‍රමුඛම විදේශික ජාතිකයින් 10 අතර වේ.
