ප්‍රජාසංවර්ධන අරමුදල් ගොඩනැගීම සඳහා එක්සත් අරාබි එමීර් රාජ්‍යයේ සහන සුභසාධක සංගමය සහ ශ්‍රී ලාංකික ප්‍රජාව හා එක්ව සංවිධානය කරනු ලැබූ “සහන ගෘහස්ථ ක්‍රිකට් ශූරතාවලිය – 2023” පසුගිය 17 වෙනිදා අල් කුස්හි INSPORTZ CLUB හි දවස පුරා අතිසාර්ථකව පවත්වනු ලැබුවා.
මෙම තරගාවලිය විවෘත, කාන්තා සහ ජ්‍යෙෂ්ට වශයෙන් කාණ්ඩ තුනක් යටතේ පැත්වූ අතර තරගාවලිය සඳහා විවෘත කාණ්ඩයට කණ්ඩායම් 15ක්, කාන්තා කාණ්ඩයට කණ්ඩායම් 6ක් සහ ජ්‍යෙෂ්ට කාණ්ඩයට කණ්ඩායම් 4ක් වශයෙන් කණ්ඩායම් 25ක් ශූරතාවලිය සඳහා තරග වැදුනා.
වීවෘත කාණ්ඩය යටතේ පැවති තරග අතරින් ශූරතාවය City Star කණ්ඩායම විසින් දිනාගනු ලැබූ අතර අනුශූරතාවය Finwin කණ්ඩායම විසින් දිනාගනු ලැබුවා. මෙම කාණ්ඩය යටතේ හොඳම පන්ඳු යැවීම සඳහා Finwin කණ්ඩායමේ ඉෂාම්ද, හොඳම පිතිකරු ලෙස City Star කණ්ඩායමේ ජූඩ්ද, තරගාවලියේ වීරයා ලෙස Finwin කණ්ඩායමේ ඉෂාම්ද තෝරා ගැනුනා.
කාන්තා කාණ්ඩය යටතේ පැවති තරග අතරින් ශූරතාවය Thambapanni කණ්ඩායම විසින් දිනාගනු ලැබූ අතර අනුශූරතාවය Leo CC කණ්ඩායම විසින් දිනාගනු ලැබුවා. මෙම කාණ්ඩය යටතේ හොඳම පන්ඳු යැවීම සඳහා Thambapanni කණ්ඩායමේ ෂාලුද, හොඳම පිතිකරු ලෙස Leo CC කණ්ඩායමේ චාමිද, තරගාවලියේ වීරයා ලෙස Thambapanni කණ්ඩායමේ මෙත්මාද තෝරා ගැනුනා.
ජ්‍යෙෂ්ට කාණ්ඩය යටතේ පැවති තරග අතරින් ශූරතාවය Legends Masters කණ්ඩායම විසින් දිනාගනු ලැබූ අතර අනුශූරතාවය Ceylon Thunders කණ්ඩායම විසින් දිනාගනු ලැබුවා. මෙම කාණ්ඩය යටතේ හොඳම පන්ඳු යැවීම සඳහා Ceylon Thunders කණ්ඩායමේ ෆිරාස්ද, හොඳම පිතිකරු ලෙස Legend Masters කණ්ඩායමේ මාලිංගද, තරගාවලියේ වීරයා ලෙස Legend Masters කණ්ඩායමේ සුදාර් ද තෝරා ගැනුනා.
සහන ගෘහස්ථ ක්‍රිකට් ශූරතාවලිය – 2023 මගින් එකතුවෙන අරමුදල් එක්සත් අරාබි එමීර් රාජ්‍යයේ වෙසෙන ශ්‍රී ලාංකික ප්‍රජාවගේ සුභසාධන කටයුතු සඳහා යොදවනු ලබනවා.
