අනන්‍යතාවය, පුරවැසිභාවය, රේගු සහ වරාය ආරක්ෂාව සඳහා වන ෆෙඩරල් අධිකාරිය (ICP) ඉක්මනින්ම ඔවුන්ගේ ICP දත්ත ගබඩාවෙන්, UAEහි වැසියන් පිළිබඳ නිවැරදි දත්ත ලබා ගැනීමට පුද්ගලික අංශයේ සමාගම්වලටද අවස්ථාවක් ලබාදීමට නව පද්ධතියක් දියත් කරනු ඇත. මෙහිදී කාඩ්පත් කියවීමේ උපකරණවල අවශ්‍යතාවය ඉවත් කරමින් දත්ත ලබා ගැනීමට පුද්ගලික අංශයේ සමාගම්වලට අවස්ථාව හිමිවීම විශේෂත්වයක්.
මෙම පද්ධතිය පසුගියදා ඩුබායි ලෝක වෙළඳ මධ්‍යස්ථානයේ පැවති Gitex Global ලොව විශාලතම තාක්ෂණ ප්‍රදර්ශනයේදී ප්‍රදර්ශනය කරන ලදි.
දැනට, ICP දත්ත ගබඩාවෙන් පදිංචිකරුවන් සහ පුරවැසියන් පිළිබඳ තොරතුරු ලබාගැනීමට එමිරේට්ස් හැඳුනුම්පත් කියවනයට (card reader) කාඩ්පත් ඇතුළත් කල යුතුය.
“Akeed යනු ඉක්මනින් දියත් කෙරෙන නව පද්ධතියක් වන අතර මූල්‍ය, සෞඛ්‍ය, රක්ෂණ සහ වෙනත් අංශවල ආයතනවලට, ඔවුන්ට අවශ්‍ය ICP දත්ත ගබඩාවෙන් නිවැරදි තොරතුරු ලබා ගැනීමට එය උපකාර කරයි. උදාහරණයක් ලෙස, සෞඛ්‍ය සේවා සමාගමකට යමෙකුගේ නම, විදේශ ගමන් බලපත්‍ර විස්තර හෝ රක්ෂණ ඔප්පු විස්තර අවශ්‍ය නම්, එය දත්ත ගබඩාවෙන් ලබා ගත හැක. මෙමගින් සෑම ආයතනයකටම නිවැරදි තොරතුරු ඇති බවට සහතික වන අතර ජනතාව සහ සමාගම් සඳහා කාලය ඉතිරි කර ගත හැක. මෙම සේවාව කාඩ්පත් කියවනය ප්‍රතිස්ථාපනය කරනු ඇත. එබැවින් ජනතාවට එමිරේට්ස් හැඳුනුම්පත කාඩ්පත් කියවනය තුළ තැබීමට අවශ්‍ය නැත.” Gitex ප්‍රදර්ශනයේදී ICP ප්‍රකාශකයෙක් පැවසීය.
දැනටමත් පදිංචි බලපත්‍ර සහ එමිරේට්ස් හැඳුනුම්පත් නිකුත් කර ඇති පුද්ගලයින් සඳහා සමාගම්වලට Akeed හරහා තොරතුරු ලබා ගත හැකිය.
කෙසේ වෙතත්, මෙම සේවාව නොමිලේ සපයන්නේද නැතහොත් සේවා සඳහා ගාස්තුවක් ගෙවීමට සමාගම්වලට සිදුවේද යන්න මෙතෙක් පැහැදිලි කොට නැත.
