ආසියාවේ විශාලතම සූපවේදී තරගාවලියක් වන “Culinary art food expo 2023”, (Sri lanka Cafe 2023) ආහාර ප්‍රදර්ශනයට සමගාමීව පසුගියදා කොළඹ බණ්ඩාරණායක අනුස්මරණ සම්මන්ත්‍රණ ශාලාවේදී අති උත්කර්ෂවත් ලෙස පැවැත්වුනා. ජෙරාඩ් මෙන්ඩිස්, දිමුතු කුමාරසිංහ යන සූපවේදීන්ගේ ප්‍රමුඛත්වයෙන් යුත් ශ්‍රී ලංකා සූපවේදීන්ගේ සංගමය විසින් මෙම තරගාවලිය සංවිධානය කල අතර මෙහි ප්‍රධාන ආරාධිත අමුත්තා ලෙස අතිගරු ජනාධිපති රනිල් වික්‍රමසිංහ මහතා සහභාගී වූවා. වසර දෙකකට වරක් පැවැත්වෙන මෙම තරගාවලිය සදහා මෙවර රටවල් 13 කට අධික සංඛ්‍යාවක් සහභාගි වී තිබෙනවා.
“වසරේ යොවුන් සූපවේදියා” යන තරග අංශයය නියෝජනය කරමින් සහභාගි වූ ආධුනික සූපවේදී උෂාන් සජීන්ද්‍ර විසින් එම අංශයේ ජයග්‍රහණය හිමි කර ගනු ලැබුවා. වයස අවුරුදු 23 ක් වන සූපවේදී උෂාන් සජීන්ද්‍ර මේ වන විට කොළඹ සිනමන් ලේක් සයිඩ් හෝටලයේ සේවය කරන අතර මෙම ජයග්‍රහණයත් සමග ඔහුට මසක කාලයක් එක්සත් අරාබි එමීර් රාජ්‍ය යේ පිහිටි ප්‍රධාන පෙලේ හෝටල් රැසකින් පුහුණුව ලැබීමට අවස්ථාව හිමි වී තිබීම විශේෂත්වයක්. එම හෝටල් අතර ඩුබායි හි පිහිටි Jumeirah creek side, pullman, Novatel සහ Raddison blue යන හෝටල් සමූහයද, අබුඩාබි හි පිහිටි st pegis හා The club යන හෝටල් ද්විත්වයද ඇතුලත් වනවා. තවද Fujairah නගරයේ පිහිටි Miramar resort යන හෝටලයද මේ පුහුණුව සදහා සිය දායකත්වය ලබා දෙනු ඇති. මෙම පුහුණුව සඳහා අනුග්‍රාහකත්වය ලබා දෙන්නේ එක්සත් අරාබි එමීර් රාජ්‍ය යේ පිහිටි ශ්‍රී ලංකා ආගන්තුක සත්කාර හා සූපවේදී වෘත්තිකයන්ගේ සංගමයයි. තරගාවලියේ විනිශ්චය මණ්ඩලයට එක්සත් අරාබි එමීර් රාජ්‍ය නියෝජනය කරමින් ශ්‍රී ලංකා ආගන්තුක සත්කාර හා සූපවේදී වෘත්තිකයන්ගේ සංගමයේ සාමාජිකයන් වන සූපවේදී K.A.C. ප්‍රසාද්, කුශාන් පෙරේරා හා පීටර් ඩී. කුවේ යන මහත්වරුන් සහභාගී වුනා.
එක්සත් එමීර් රාජ්‍යයේ ශ්‍රී ලංකා ආගන්තුක සත්කාර ඒකකයේ විධායක K.A.C. ප්‍රසාද් මහතා පැවසුවේ, මෙය පළමු වරට ඔවුන් විසින් සංවිධානය කරන ලද අතර එය ශ්‍රී ලංකාවේ ආගන්තුක සත්කාර ක්ෂේත්‍රය වෙනුවෙන් සහ එහි පැවැත්ම වෙනුවෙන් ගනු ලැබූ වටිනා තීරණයක් බව ඔහු විශ්වාස කරන බවයි.
