ඩුබායි ක්‍රීඩා කවුන්සිලය විසින් අනුමත කරන ලද, ඩුබායි මැරතන් තරඟයේ 23 වන අදියර, 2024 ජනවාරි 7 වන ඉරිදා දින පැවැත්වෙන අතර තරග ඉසව් ලෙස කිලෝමීටර් 4ක විනෝද දිවීම් තරඟය, කිලෝමීටර් 10ක මාර්ග ධාවන තරඟය සහ කිලෝමීටර් 42.195 දුර ප්‍රධාන මැරතන් ධාවන තරඟය ඇතුලත් වෙනවා. ඉසව් සංවිධායකයින් ලෙස ඩුබායි ක්‍රීඩා කවුන්සිලය, ඩුබායි පොලිසිය සහ ඩුබායිහි මාර්ග සහ ප්‍රවාහන අධිකාරිය කටයුතු කරනවා.
ඩුබායි මැරතන් තරඟයේ ඉසව් අධ්‍යක්ෂක පීටර් කොනර්ටන් සඳහන් කලේ “2024 ඩුබායි මැරතන් තරඟය පැවැත්වීම සඳහා අප සමඟ එක්ව කටයුතු කිරීම සම්බන්ධයෙන් ඩුබායි ක්‍රීඩා කවුන්සිලයට මෙන්ම ඩුබායි පොලිසිය, ඩුබායි මාර්ග සහ ප්‍රවාහන අධිකාරිය සහ ඩුබායි මහ නගර සභාවට අපි බෙහෙවින් ස්තූතිවන්ත වෙනවා. ඇත්ත වශයෙන්ම, ඩුබායි වැනි සමෘද්ධිමත් අගනගරයක් තුළ ප්‍රධාන ජාත්‍යන්තර මැරතන් තරඟයක් පැවැත්වීම සඳහා විවිධ රජයේ දෙපාර්තමේන්තු අතර පුළුල් සම්බන්ධීකරණයක් අවශ්‍ය වෙනවා.”
ඩුබායි ක්‍රීඩා කවුන්සිලයේ මහලේකම් සයීඩ් හරෙබ් ප්‍රකාශකලේ වාර්ෂික ක්‍රීඩා ඉසව් පෙලගැස්ම අතර ඩුබායි මැරතන් තරඟය ලොව විශාලතම ඉසව් වලින් එකක් ලෙස හොඳින් ස්ථාපිත වී ඇති අතර එය සියලුම වයස් සහ හැකියාවන්ගෙන් යුත් ධාවකයන්ගේ ප්‍රියතම තරග වලින් එකක් බැවින් ඒ සඳහා ඩුබායි නගරයේ සැමගේ අවධානට ඊට යොමුව ඇති බවයි.
“ඩුබායි රජයේ සහයෝගය සමගින්, ජාත්‍යන්තර ධාවන තරඟය නගරයේ හදවතට ගෙන එන තවත් අමතක නොවන ඉසව්වක් පැවැත්වීමට අපි සංවිධායකයින් සමඟ සමීපව කටයුතු කරන්නෙමු.” සයීඩ් හරෙබ් වැඩිදුරටත් සඳහන් කලේය.
මැදපෙරදිග පළමු සහ පැරණිතම ජාත්‍යන්තර මැරතන් තරඟයේ 2024 අදියර සඳහා ලියාපදිංචි වන ධාවකයන්, ඩුබායි පොලිස් ඇකඩමියට ආසන්න උම් සුකීම් පාරෙන් තරඟය ආරම්භ කර අවසන් කරනු ඇත. කිලෝමීටර 42.195 ක දුරක් පුරා විහිදෙන ධාවන මාර්ගය බර්ජ් අල් ඇරැබ් සහ මඩිනාට් ජුමෙයිරා වැනි සුප්‍රසිද්ධ බිම් සලකුණු ඔස්සේ ජුමෙයිරා බීච් පාර හරහා රැගෙන යනු ඇත.
2024 ඩුබායි මැරතන් තරඟය, පැරිසියේ ගිම්හාන ඔලිම්පික් උළෙල පැවැත්වීමට මාස හයකට වඩා වැඩි කාලයකට පෙර පැවැත්වෙන බැවින් ඔලිම්පික් සුදුසුකම් ලැබීමේ කාලයක් වාර්තා කිරීමට හොඳම අවස්ථාවක් ලෙස ඉහළ මට්ටමේ ක්‍රීඩක ක්‍රීඩිකාවන්, නැගී එන තරු සහ ආරම්භක ක්‍රීඩකයින් විසින් සලකනු ලබනවා.
මෙම තරඟය, ක්‍රීඩා තරු සහ නිත්‍ය ධාවකයන් සඳහා විශේෂයෙන් හිතකර එකක් ලෙස හඳුන්වනු ලබනවා. විශේෂයෙන් ජනවාරි මාසය මුලදී ඩුබායි හි දුර දිවීම සඳහා හිතකර වන උෂ්ණත්වයක් පවතින බැවින් ධාවනයේදී ඉක්මන් වේලාවන් වාර්තා කිරීම අපේක්ෂා කෙරේ. 2024 වසරේ පැරිසියේ පැවැත්වෙන ගිම්හාන ඔලිම්පික් උළෙලේ මැරතන් තරඟයට තරග කිරීමට, ඔලිම්පික් කමිටුව සහ ඔවුන්ගේ ජාතික සම්මේලනය විසින් නියම කර ඇති ප්‍රමිතියට ළඟා වීමට ක්‍රීඩක ක්‍රීඩිකාවන්ට 2024 අප්‍රේල් 30 දක්වා කාලය තිබේ.
“ඩුබායි මැරතන් තරඟය යනු, ඔවුන්ව ගෝලීය අවධානයට ලක් කළ හැකි ධාවන තරඟයක් බව ජාත්‍යන්තර ක්‍රීඩක ක්‍රීඩිකාවන් හොඳින් දනී, එය දිගු දුර ධාවන තරගවල සාර්ථක වෘත්තියකට දොරටු විවර කරයි” යනුවෙන් කොනර්ටන් වැඩිදුරටත් පැවසීය.
