2025 වසරේ පෙබරවාරි මස එක්සත් අරාබි එමීර් රාජ්‍යයේ පැවැත්වීමට නියමිත ලෝක රාජ්‍ය සමුළුව ඇමතීම සඳහා ජනාධිපති අනුර කුමාර දිසානායක මහතාට එමීර් රාජ්‍යයේ ජනාධිපතිවරයා විසින් ආරාධනා කිරීමට නියමිතව තිබේ.
ඒ බව ශ්‍රී ලංකාවේ එමීර් රාජ්‍යයේ තානාපති Khaled Nasser Al Ameri මහතා විසින් දැනුම්දෙනු ලැබුවේ, කථානායක අසෝක රන්වල මහතා (09) දා පාර්ලිමේන්තුවේදී හමු වූ අවස්ථාවේදීය.
එමෙන්ම 2024 වසරේදී ඉන්දීය අගමැති නරේන්ද්‍ර මෝදි මෙම සමුළුව ඇමතූ බව තානාපතිවරයා ප්‍රකාශ කළේය.
දූෂණයට එරෙහිව කටයුතු කිරීමට ඇති හොඳම ක්‍රමය රාජ්‍ය සේවය මෙහෙයවීම මාර්ගගත ක්‍රමය ඔස්සේ සිදු කිරීම බව මෙහිදි සඳහන් කෙරිණි.
මේ සම්බන්ධයෙන් අවශ්‍යවන විශේෂඥ දැනුම බෙදාගැනීමට තම රාජ්‍ය කැමැත්තෙන් සිටින බව තනාපතිවරයා මෙහිදී පෙන්වා දුන්නේය.
එමෙන්ම විනිවිදභාවයෙන් යුතු ආකර්ෂණීය ආයෝජන ක්‍රවේදයන් සකස් කිරීමේ වැදගත්කම පිළිබඳවද මෙහිදී සාකච්ඡා කෙරුණු බව සඳහන් වේ.
එක්සත් අරාබි එමීර් රාජ්‍යයේ වෙසෙන ශ්‍රී ලාංකිකයන් වෘත්තීයමය දක්ෂතාවයෙන් යුතු සාමකාමී පිරිසක් ලෙස අගයකරන බවයි තානාපතිවරයා වැඩිදුරටත් සඳහන් කළේය.
තාක්ෂණික සහ පුනර්ජනනීය බලශක්ති ක්ෂේත්‍රයේ ඇති විය හැකි ප්‍රගතිය පිළිබඳව ද දෙපාර්ශවය අතර සාකච්ඡා පැවති අතර ආයෝජන පුළුල් කිරීමේ හැකියාව පිළිබඳවද මෙහිදී අවධානය යොමුවී තිබේ.
මීට අමතරව දෙරට අතර සබඳතා තවදුරටත් ශක්තිමත් කිරීම සඳහා ශ්‍රී ලංකා, එක්සත් අරාබි එමීර් රාජ්‍ය පාර්ලිමේන්තු මිත්‍රත්ව සංගමය යළි පණ ගැන්වීම සම්බන්ධයෙන් ද මෙහිදී සාකච්ඡා වූ බවයි පාර්ලිමේන්තු සන්නිවේදන දෙපාර්තමේන්තුව සඳහන් කළේය.
