විදෙස් ගමන් බලපත්‍ර නිකුත් කිරීමේ දී ඇති වී තිබෙන ප්‍රමාදයන් මඟහරවා ගැනීමේ අරමුණෙන් දිනකට ගමන් බලපත්‍ර 4000ක් නිකුත් කිරීම සඳහා ආගමන විගමන දෙපාර්තමේන්තුව පැය 24 පුරා ක්‍රියාත්මක කිරීමට ආණ්ඩුව තීරණය කර ඇත.
ඒ සඳහා අතිරේක කාර්ය මණ්ඩලයක් අනුයුක්ත කර ගැනීමට ජනාධිපති අනුර කුමාර දිසානායක මහතාගේ ප්‍රධානත්වයෙන් පසුගිය 03 වැනිදා රැස් වූ කැබිනට් මණ්ඩලය අනුමැතිය ලබා දී තිබේ.
පැය 24 පුරා සේවය සැලසීමේ වැඩපිළිවෙළ සඳහා අමතර කාර්ය මණ්ඩලය සපයා ගැනීමේදී ආගමන විගමන දෙපාර්තමේන්තුවේ සේවය කර විශ්‍රාම ලබා ඇති නිලධාරින් බඳවා ගැනීමට නියමිතය.
රාජ්‍ය සේවා කොමිෂන් සභාවේ එකඟතාව මත කොන්ත්‍රාත් පදනමින් සේවයේ යෙදවීමට සහ රාජ්‍ය පරිපාලන, පළාත් සභා සහ පළාත් පාලන අමාත්‍යාංශයේ අනුමැතිය ලබා ගෙන රාජ්‍ය නිලධාරීන් අනුයුක්ත කර ගැනීමටද යෝජනා වී තිබේ.
කැබිනට් තීරණ දැනුම්දීම සඳහා රජයේ ප්‍රවෘත්ති දෙපාර්තමේන්තුවේදී පැවැති මාධ්‍ය හමුවේදී කැබිනට් ප්‍රකාශක, ඇමැති වෛද්‍ය නලින්ද ජයතිස්ස මහතා පැවසුවේ මේ සඳහා වූ යෝජනාව මහජන ආරක්ෂක සහ පාර්ලිමේන්තු කටයුතු ඇමැති ආනන්ද විජේපාල මහතා ඉදිරිපත් කළ බවයි. ඒ සඳහා කැබිනට් මණ්ඩලයේ අනුමැතිය පළ වූ බවද ඇමැතිවරයා කීවේය.
අමාත්‍ය මණ්ඩලය විසින් පත් කරන ලද විද්වත් කමිටුවේ නිර්දේශය අනුව ‘පී’ කාණ්ඩයේ චිපය රහිත හිස් විදේශ ගමන් බලපත්‍ර 1,100,000ක් වත්මන් සැපයුම්කරු වෙතින් සපයා ගැනීමේ ප්‍රසම්පාදන ක්‍රියාවලිය මේ වන විට ආරම්භ කර ඇතැයිද ඇමැතිවරයා පැවසුවේය.
විදෙස් ගමන් බලපත්‍ර නිකුත් කිරීමේදී ඇතිවන ප්‍රමාදයන් වළක්වා ගනිමින් මහජනතාවට කඩිනම් සේවාවක් ලබා දීමට හැකියාව ලැබෙන බවද ඇමැතිවරයා කීවේය.
