සමාජ මාධ්‍ය තුළ ප්‍රවර්ධනය කරමින් තිබෙන වංචනික ක්‍රිප්ටෝ මුදල් ව්‍යාපාර පිළිබඳ අග්‍රාමාත්‍ය කාර්යාලයෙන් විශේෂ නිවේදනයක් යොමුකර ඇත.
මෙම වංචනික දැන්වීම් සමාජ මාධ්‍ය හරහා ප්‍රවර්ධනය කරමින් විදේශීය ආයතන විසින් මෙරට ජනතාව නොමඟ යවන බව එහි දැක්වේ.
අග්‍රාමාත්‍ය ආචාර්ය හරිනි අමරසූරිය සහ අනෙකුත් ප්‍රසිද්ධ ශ්‍රී ලාංකික පුද්ගලයින්ගේ නම් ඒ භාවිත කරමින් මෙම වංචනික ප්‍රචාරණ සිදුකරමින් සිටියි.
විශේෂයෙන් ප්‍රසිද්ධ පුද්ගලයින් පිළිබඳ ජනතාව තුළ ඇති සුහඳතාව පළුදු කරමින් මහජනතාව නොමඟ යවා ප්‍රසිද්ධ පුද්ගලයින් කෙරෙහි ඇති විශ්වාසය බිඳ දැමීම මෙම දැන්වීම් වල ප්‍රධාන අරමුණ වී තිබේ.
ලිතුවේනියාවේ සිට ක්‍රියාත්මක කරන මෙම වංචනික ගිණුම් මගින් සිදු කරන මෙම වංචනික දැන්වීම් සහ ප්‍රවර්ධනයන් ශ්‍රී ලංකාවේ ෆේස්බුක් භාවිතා කරන්නන් ඉලක්ක කරමින් සක්‍රියව ක්‍රියාත්මක වෙමින් තිබෙන බව අවධානයට යොමු වී තිබෙන බවත් නිවේදනයේ දැක්වෙයි.
මෑතකදී විදේශ අමාත්‍ය විජිත හේරත්, විද්‍යා හා තාක්ෂණ අමාත්‍ය පාර්ලිමේන්තු මන්ත්‍රී ක්‍රිශාන්ත අබේසේන සහ ප්‍රසිද්ධ මාධ්‍යවේදීන් වන අමන්තා පෙරේරා සහ සුනන්ද දේශප්‍රිය මෙන්ම මීට පෙර අවස්ථාවලදී වෙනත් ශ්‍රී ලාංකික ප්‍රසිද්ධ පුද්ගලයින් ද මෙම දැන්වීම් මගින් ප්‍රචාරණය කර තිබෙන බව එහි සඳහන්ය.
විශේෂයෙන්ම රජයේ නිලධාරීන් සහ ප්‍රසිද්ධ පුද්ගලයින්ගේ අනුමැතිය ඇතැයි අසත්‍ය ලෙස ප්‍රකාශ කරන ක්‍රිප්ටෝ මුදල් ආයෝජන ප්‍රවර්ධනය කරන ඔන්ලයින් දැන්වීම් වලින් අතිශයින් ප්‍රවේශම් වන ලෙස පුරවැසියන්ගෙන් ඉල්ලා සිටින බවත් නිවේදනයෙන් ඉල්ලා සිටියේය.
කිසිදු රජයේ නිලධාරියෙකු හෝ අමාත්‍යාංශයක් කිසිදු ක්‍රිප්ටෝ මුදල් ආයෝජන යෝජනා ක්‍රමයක් අනුමත කර නොමැති බවත් වාර්තා සහ ඉවත් කිරීමේ ඉල්ලීම් තිබියදීත් මෙම වංචාවන් සමාජ මාධ්‍ය වේදිකාවල දිගින් දිගටම දක්නට ලැබෙන අතර වංචනික දැන්වීම් ඵලදායී ලෙස මැඩපැවැත්වීමට ෆේස්බුක් හි ඇති නොහැකියාව පිළිබඳ බරපතල සැකයක් සහ කනසල්ලක් ඇති වී තිබෙන බවත් එහි සදහන්ය.
මෙම රැවටිලිකාර ව්‍යාපාර පැතිරීම වැළැක්වීමට සහ ශ්‍රී ලාංකික පරිශීලකයින් මූල්‍ය වංචාවෙන් ආරක්ෂා කිරීමට වහාම දැඩි ක්‍රියාමාර්ග ගන්නා ලෙස ෆේස්බුක් මව් සමාගම වන මෙටා සමාගම වෙතින් ඉල්ලා ඇති බවත් ප්‍රසිද්ධ පුද්ගලයින්ගේ අනුමැතිය ඇතැයි කියන සැක සහිත දැන්වීම් සමඟ සම්බන්ධ නොවන ලෙසත්, එම ප්‍රවර්ධනයන් හෝ දැන්වීම් තුළට නොයන ලෙසත් ෆේස්බුක් සහ ඉන්ස්ටග්‍රෑම් හි වංචනික දැන්වීම් කෙලින්ම අදාල සමාගම් වෙත වාර්තා කරන ලෙසත්, ආයෝජනය කිරීමට පෙර නීත්‍යානුකූල මූලාශ්‍ර හරහා සියලුම මූල්‍ය අවස්ථා සනාථ කර ගන්නා ලෙසත් මහජනතාවගෙන් ඉල්ලා ඇත.
