පාඩු ලබන රාජ්‍ය ආයතන ප්‍රතිව්‍යුහගතකරණය යටතේ ශ්‍රී ලංකන් ගුවන් සමාගම සතු කොටස් ඉන්දියාවේ ටාටා සමාගම වෙත පැවරීමට මූලික වටයේ සාකච්ඡාවක් සිදුවන බවට රජයේ ආරංචි මාර්ග සඳහන් කරයි.
එම ආරංචි මාර්ග වැඩිදුරටත් පවසන්නේ ඉන්දියාවේ දැවැන්ත ව්‍යාපාර සමූහයක් වන ටාටා සමාගම ශ්‍රී ලන්කන් ගුවන් සමාගමේ සැලකිය යුතු කොටස් ප්‍රමාණයක් හිමිකර ගැනීමට උනන්දුවෙන් පසුවන බවයි.
විශේෂයෙන්ම ශ්‍රී ලන්කන් ගුවන් සමාගම පසුගිය කාලයේදී ණය කන්දක් රැස් කරමින් පාඩු ලබන ව්‍යාපාරයක් ලෙස ඉදිරියට පැමිණීම තුළ මෙම ප්‍රතිව්‍යුහගතකරණ වැඩපිළිවෙළ කරළියට පැමිණියේය.
ශ්‍රී ලංකවේ මෑතකාලීන ආර්ථික අර්බුදය සමග මෙය ඒකාබද්ධවීම නිසා රජයටද ගුවන් සේවය පෞද්ගලිකරණය කිරීම හැර වෙනත් විකල්පයක් ඉතිරි වී නොමැති බවත් හැඟවේ.
ශ්‍රී ලන්කන් ගුවන් සේවය මිලදී ගැනීමට සූදානම් යැයි කියන ටාටා සමූහය මීට වසර කිහිපයකට පෙර පාඩු ලබන ඉන්දියානු ගුවන් සමාගමක් වන එයාර් ඉන්දියා මිලදී ගත් අතර එය මුල සිටම ප්‍රතිසංස්කරණය කළේය.
ඊට අමතරව ටාටා සමූහයට තවත් ඉන්දියානු ගුවන් සේවා තුනක් ඇති අතර ඒවා නම් එයාර් ඒෂියා ඉන්දියා, එයාර් ඉන්දියා එක්ස්ප්‍රස් හා විස්තාරා යන ගුවන් සේවාවන්ය.
කෙසේ වෙතත් ටාටා සමූහය විස්තාරා ගුවන් සේවය, එයාර් ඉන්දියා සමග ඒකාබද්ධ කිරීමට උත්සාහයන් සිදුවන අතර ඉතිරි ගුවන් සේවාවන් දෙකටද එම ඉරණමම අත්වෙනු ඇති බව ඉන්දීය මාධ්‍ය වාර්තා කරයි.
ඒ අනුව ටාටා සමූහය විසින් ශ්‍රී ලන්කන් ගුවන් සේවය මිලදී ගන්නේ නම් එය ස්ථානගතවන්නේ කවර තැනකටද යන්න සිත්ගන්නා සුලු කරුණක් බව ඉන්දීය මාධ්‍ය වැඩිදුරටත් වාර්තා කරයි.
