ඩුබායිහි ශ්‍රී ලංකා කොන්සල් ජනරාල් කාර්යාලය මගින් පවත්වාගෙන යනු ලබන සුරක්ෂා නිවසේ (Safehouse) සිටින ශ්‍රී ලාංකික සහෝදරියන් කිහිප දෙනෙකුට ඔවුන්ගේ වෛද්‍ය අවශ්‍යතා සපුරාලීමට සහ උපකාර කිරීමට පසුගියදා ඩුබායි සිලෝන් ලයන්ස් සමාජයේ (DCLC) අඛණ්ඩ උත්සාහයේ කොටසක් ලෙස මූලිකත්වය ගත්තේය.
මෙහිදී ඩුබායි සිලෝන් ලයන්ස් සමාජය විසින් සුරක්ෂා නිවසේ සිටි එම කාන්තාවන්ගේ ඇස් පෙනීම පරීක්ෂා කිරීම සහ වෙනත් අවශ්‍ය වෛද්‍ය පරීක්ෂණ කිරීම සඳහා සහාය දක්වන ලදි. මෙම කර්තව්‍යයට ඩුබායිහි Aloka Eye Clinic හි වෛද්‍ය උමාශංකර් රාමචන්ද්‍රන් මහතා තම ආයතනික සමාජ වගකීමක් ලෙස සලකමින් එම සේවාවන් නොමිලේ සලසා දීමට කටයුතු කිරීම විශේෂයෙන් සඳහන් කරන්නෙමු.
මීට අමතරව කොන්සල් ජනරාල් කාර්යාල බලධාරීන්ගේ ඉල්ලීම පරිදි සුරක්ෂා නිවසෙහි තාවකාලික නවාතැන් ගෙන සිටින කාන්තාවන් 50 කට වැඩි පිරිසකගේ ප්‍රයෝජනය සඳහා අත්‍යවශ්‍ය ද්‍රව්‍යයන් විශාල ප්‍රමාණයක් සැපයීමට ඩුබායි සිලෝන් ලයන්ස් සමාජයේ මානුෂීය මෙහෙවර ඔස්සේ හැකි විය.
ජාත්‍යන්තර කාන්තා දිනයට සමගාමීව සමාජයේ සෑම සාමාජිකයෙකුම මෙම වටිනා කාර්යභාරයට සහයෝගය සහ දායකත්වය ලබා දුන් අතර එහි ප්‍රතිඵලයක් ලෙස වියළි ආහාර, සිල්ලර ද්‍රව්‍ය, සනීපාරක්ෂක ද්‍රව්‍ය, ඖෂධ වැනි අත්‍යවශ්‍ය ද්‍රව්‍ය කිලෝග්‍රෑම් 250 කට වැඩි ප්‍රමාණයක් මෙන්ම රුධිර පීඩන නිරීක්ෂණ උපකරණ 2 ක් සුරක්ෂා නිවසට ලබා දීමට ඩුබායි සිලෝන් ලයන්ස් සමාජයට හැකි විය.
ඩුබායි සිලෝන් ලයන්ස් සමාජය තවත් බොහෝ සේවා ව්‍යාපෘති රැසක් සමඟින් අනාගතයේදී ප්‍රජාවට තවදුරටත් සේවය කිරීමට බලාපොරොත්තු වේ.
