පසුගියදා, කොළඹ සිනමන් ග්‍රෑන්ඩ් හෝටලයේ පැවති උත්කර්ෂවත් උත්සවයකදී ශ්‍රී ලංකා සංචාරක ව්‍යාපාරය, ”Sri Lanka – You’ll come back for more” නව ටැග්ලයිනයත් සමගින් ගෝලීය ප්‍රවර්ධන ව්‍යාපාරය දියත් කරනු ලැබුවා.
මෙම උත්සවයට ගරු සංචාරක, ඉඩම්, ක්‍රීඩා සහ යෞවන කටයුතු අමාත්‍ය හරීන් ප්‍රනාන්දු, ශ්‍රී ලංකා සංචාරක නිලධාරීන් සහ රාජ්‍ය තාන්ත්‍රික දූත මණ්ඩල නියෝජනය කරන තානාපතිවරුන්, දේශීය සහ ජාත්‍යන්තර මාධ්‍ය වාර්තාකරුවන් ඇතුළු ශ්‍රී ලංකාවේ ප්‍රධාන පෙළේ ආයතන සහ සංචාරක කර්මාන්ත පාර්ශවකරුවන් එක්ව සිටියා.
ශ්‍රී ලංකා සංචාරක ප්‍රවර්ධන කාර්යාංශයේ සභාපති චාලක ගජබාහු මහතා උත්සවයේ අරමුණ පැහැදිලි කල අතර එහි වැදගත්කම සහ සංචාරක ක්ෂේත්‍රය ප්‍රතිෂ්ඨාපනය කිරීමේදී විවිධ අභියෝග මධ්‍යයේ වුවද ශ්‍රී ලංකා සංචාරක ව්‍යාපාරය ඉදිරියට ගොස් ඇති ආකාරය සඳහන් කරමින් සහභාගිවන්නන් පිළිගනු ලැබුවා. ශ්‍රී ලංකා සංචාරක ව්‍යාපාරය සැලකිය යුතු කාලයකින් ගෝලීය ප්‍රවර්ධන ව්‍යාපාරයක් ආරම්භ කර නොමැති බැවින් සියළු පැතිකඩයන් ආවරණය වන පරිද්දෙන් අලෙවිකරණ ව්‍යාපාරයක් දියත් කිරීමේ අවශ්‍යතාව ඉස්මතු විය. පසුගිය වසරේ සිට අද දක්වා අප ලබා ඇති ජයග්‍රහණ දෙස බැලුවහොත් එය විශ්මයජනක වර්ධනයක් බව ඔහු වැඩිදුරටත් පැවසීය. පසුගිය වසරේ අපගේ සංචාරක පැමිණීම 720,000 ක් වූ අතර අපි මේ වසරේ දැනටමත් මිලියන 1.3 ක් ලබා සිටිමු, එය පුදුමාකාර ජයග්‍රහණයකි.
දිවයිනේ උතුරු, දකුණ, නැගෙනහිර සහ බස්නාහිර යන පැති හතරම නියෝජනය වන පරිදි මෙම උත්සවය සඳහා වර්ණවත් පසුබිම සකස් කොට තිබූ අතර, පළාත් හතරටම ආවේණික වූ විවිධාකාර සූපශාස්ත්‍ර තේරීම් ද ඇතුළත් විය. ප්‍රධාන වෙලඳපොලවල ප්‍රවර්ධනය කෙරෙන සියලුම පළාත්වල සියලුම සංචාරක ආකර්ෂණ ස්ථාන නියෝජනය වන පරිදි උත්සවය සඳහා පසුබිම ඉතා ආකර්ශණීය ලෙස නිර්මාණය කොට තිබුණි.
ශ්‍රී ලංකා සංචාරක ව්‍යාපාරය සෑම මසකම ශීඝ්‍රයෙන් ඉහළ යන සංචාරක පැමිණීම් සමඟින් ස්ථීර සහ ධනාත්මක ගමනක් ඉදිරියට යමින් සිටින අතර, මෑතකදී සංචාරක පැමිණීම් මිලියනයක ඉලක්‌කය පසුකර ගියේය. 2022 වසරට සාපේක්ෂව පැමිණීම් වැඩිවීමේ ප්‍රතිඵලයක් වශයෙන්, රටට සංචාරක ආදායමේ සැලකිය යුතු වර්ධනයක් ඇති වී තිබේ. මෙම ප්‍රගතියත් සමඟ, මේ වසර අවසන් වන්නට මත්තෙන් අපේක්ෂිත මුළු පැමිණීම් ගණන මිලියන 1.5ක් කරා ලඟා විය හැකිය.
මෙම අවස්ථාවේදී ගරු අමාත්‍ය හරීන් ප්‍රනාන්දු මහතා සිය වටිනා අදහස් දක්වමින් සම්භාවනීය පිරිස ඇමතුවා. “ශ්‍රී ලංකාව තනිවම ඉතා හොඳින් කටයුතු සිදුකොට තිබෙනවා, සියලුම ප්‍රචාරණයන් තනිවම මෙහෙයවූ සංචාරක කර්මාන්තයට ස්තූතිවන්ත වෙනවා. නමුත් ශ්‍රී ලංකා සංචාරක ව්‍යාපාරය හොඳින් සිතා බලා ප්‍රචාරණ ව්‍යාපාරයක් කරනු ඇතැයි මම සිතමි. අප අවබෝධ කර ගත යුතු දෙය නම්, සංචාරකයින් ශ්‍රී ලංකාවට පැමිණීමට සහ ඔවුන් නැවත පැමිණෙන බව සහතික කර ගැනීමට අප සියලු දෙනාම කාර්යභාරයක් ඉටු කළ යුතු වෙනවා. ශ්‍රී ලංකාව ගැන සංචාරකයින් දන්නා දේට වඩා බොහෝ දේ ශ්‍රී ලංකාවෙන් පිරිනැමීමට ඇත.” අමාත්‍යවරයා වැඩිදුරටත් සඳහන් කළේ, අප දිවයිනක් වුවද අපට පිරිනැමීමට බොහෝ දේ සහ පුළුල් විවිධත්වයක් ඇති බවයි.
ශ්‍රී ලංකා සංචාරක ව්‍යාපාරය එහි අඛණ්ඩ ප්‍රවර්ධන උත්සාහයන් අතර ගුවන් සම්බන්ධතා වැඩිදියුණු කිරීම සහ ඒ අනුව යටිතල පහසුකම් සංවර්ධනය කිරීම තුළින් 2023 වර්ෂය තුළ මෙම සාර්ථකත්වය අත්කර ගෙන ඇත. එහි ප්‍රතිඵලයක් වශයෙන්, සංචාරක කර්මාන්තයේ ප්‍රවර්ධනයට “ශ්‍රී ලංකා – ඔබ තවත් බොහෝ දේ සඳහා නැවත පැමිණේවි” යන නව ටැග්ලයිනයත් සමගින් මෙම දූපත් පාරාදීසය ලබා දෙන විශ්මිත සංචාරක සහ නිවාඩු අත්දැකීම් පැහැදිලිව පෙන්වා දෙයි.
