එක්සත් අරාබි එමීර් රාජ්‍යයේ මානව සම්පත් සහ එමරාතීකරණ අමාත්‍යාංශය (MOHRE) උෂ්ණත්වය උපරිම වන ගිම්හාන මාසවලදී එළිමහනේ වැඩ තහනමක් ක්‍රියාත්මක කර ඇත. මෙම තහනම අද සිට ක්‍රියාත්මක වන අතර සැප්තැම්බර් 15 දක්වා බල පැවැත්වෙනු ඇති.
දහවල් වැඩ තහනම බල පැවැත්වෙන කාලසීමාවේදී දහවල් වැඩ විවේකය දිනපතා දහවල් 12:30 සිට පස්වරු 3 දක්වා වේ. මානව සම්පත් සහ එමරාතීකරණ අමාත්‍යාංශය සේවක ආරක්ෂාව වෙනුවෙන් කැපවී සිටින බවත්, 19 වැනි වසරටත් දහවල් වැඩ විරාමය ක්‍රියාත්මක කරන බවත් යළි අවධාරණය කරයි.
මානව සම්පත් සහ එමරාතීකරණ අමාත්‍යාංශය සමාජ මාධ්‍ය ඔස්සේ ප්‍රචාරණය කල නිවේදනයකට අනුව පවසන්නේ “මෙම මුලපිරීම ආරක්ෂිත සේවා ස්ථානයක් සහතික කරන අතර ගිම්හානයේදී උෂ්ණත්වය සම්බන්ධ අවදානම් වලින් සේවකයින් ආරක්ෂා කරන බවයි”
2022 අංක (44) දරන අමාත්‍ය තීරණයට අනුකූලව මෙම තීරණය කම්කරුවන්ගේ වෘත්තීය සෞඛ්‍ය සහ ආරක්ෂාවට ප්‍රමුඛත්වය දීම, විභව අන්තරායන් සහ වෘත්තීය රෝග වලින් ඔවුන් ආරක්ෂා කිරීම අරමුණු කර ගෙන ඇති බව එම නිවේදනයේ දැක්වේ.
මෙම තහනම මගින් දෛනික වැඩ කරන වේලාවන් උදේ සහ සවස යන දෙකෙහිම උපරිම වශයෙන් පැය අටක් දක්වා සීමා කෙරේ. තවද, සේවා යෝජකයන් අක්‍රිය කාලය තුළ කම්කරුවන්ගේ සුවපහසුව සහතික කිරීම සඳහා සෙවන සහිත ප්‍රදේශ සැපයීමට අවශ්‍ය වේ.
තහනමේ විධිවිධාන සහ පාලනයන් උල්ලංඝනය කිරීම සඳහා අමාත්‍යාංශය විසින් දඩ නියම කර ඇති අතර, එක් සේවකයෙකුට ඩිරාම් 5,000 ක් සහ වැඩි සේවකයන් පිරිසක් හරහා උල්ලංඝනය කිරීම් සඳහා උපරිම ඩිරාම් 50,000 ක් දක්වා වේ.
පරීක්ෂණ කටයුතු පිළිබඳ සහකාර උප ලේකම් මොහ්සෙන් අල්-නාසි, “කම්කරුවන්ගේ සෞඛ්‍යය සහ ආරක්ෂාව ශ්‍රම වෙලඳපොල නීති සම්පාදනයේ ප්‍රධාන කුළුණක්” බව ප්‍රකාශ කරමින් තීරණයේ වැදගත්කම අවධාරණය කළේය.
