දඹුල්ල පළමු තැන රැකගෙන අවසන් වටයට

ලංකා ප්‍රිමියර් ලීග් තරගාවලියේ මූලික වටයේ 19 වැනි තරගය ලෙස බී-ලව් කැන්ඩි කණ්ඩායම සහ දඹුල්ල අවුරා කණ්ඩායම අතර ඊ​යේ කොළඹ ආර්. ප්‍රේමදාස ක්‍රීඩාංගණයේදී පැවැති තර​ඟයෙන් ලකුණු 20 ක ජයක් වාර්තා කිරීමට දඹුල්ල අවුරා කණ්ඩායම සමත් විය. මෙම ජයග්‍රහණයත් සමග දඹුල්ල කණ්ඩායම ලකුණු 12 ක් ලබා ප්‍රසාද ලකුණු සටහනේ පළමු ස්ථානය රැකගනිමින් මූලික වටය නිමා කළේය.

ජයග්‍රහණය සඳහා ලකුණු 163 ක ඉලක්කයක් හඹාගිය බී-ලව් කැන්ඩි කණ්ඩායමට ධනංජය ද සිල්වා ප්‍රමුඛ දඹුල්ල පන්දු යවන්නන්ගේ දක්ෂ පන්දු යැවීම හමුවේ ඕවර 20 අවසන් වන විට සියලු දෙනා දැවී ලබාගත හැකි වූයේ ලකුණු 142 ක් පමණි. විශිෂ්ඨ පන්දු යැවීමක නිරත වූ ධනංජය ඕවර 2 ක් යවමින් ලකුණු 6 කට කඩුලු 4 ක් බිඳහෙළමින් කැන්ඩි කණ්ඩායමේ ජයග්‍රාහී මාවත අවහිර කළේය.

සෙසු පිතිකරුවන් අසාර්ථක වෙද්දී එක් අන්තයක් රැකගෙන හුදකලා පිතිහරඹයක නිරත වූ දිනේෂ් චන්දිමාල් පන්ඳු 46 කදී හතරේ පහර 6 ක් සමග ලකුණු 50 ක් රැස්කළේය. චන්දිමාල් පිටියේ රැදී සිටින තෙක් කැන්ඩි කණ්ඩයමේ රසිකයෝ ජයග්‍රහණය කෙරෙහි බලාපොරොත්තු තබා සිටි නමුත් හේඩ්න් කේර් ගේ පන්දුවක් පිත්තේ ඇතුළත දාරයේ වැදී කඩුල්ල මත පතිත වීමෙන් 8 වැනි කඩුල්ල ලෙස චන්දිමාල් දැවී යෑමත් සමග එම බලාපොරොත්තු බිඳවැටිණ.

පළමුවෙන් පන්දුවට පහරදුන් දඹුල්ල අවුරා කණ්ඩායම ඕවර 20 අවසානයේ කඩුළු 7 ක් දැවී ලකුණු 162 ක් ලබාගත් අතර පළමු කඩුල්ල වෙනුවෙන් පන්දු 47 කදී ලකුණු 61 ක වේගවත් සම්බන්ධතාවක් ගොඩනැගූ අවිෂ්ක ප්‍රනාන්දු (41) සහ සදීර සමරවික්‍රම (31) දඹුල්ල කණ්ඩායමට සාර් ථක ආරම්භයක් ලබාදුන්හ. පන්ඳු 26 කදී වාර් තා වූ සදීරගේ ඉනිමට හතරේ පහර 6 ක්ද, පන්දු 27 කදී වාර් තා වූ අවිෂ්කගේ ඉනිමට හයේ පහර 3 ක් සහ හතරේ පහර 3 ක්ද ඇතුළත් විය.

කෙසේ වුවත් ලකුණු 43 ක් තුළ කඩුලු 5 ක් දවාගැනීමට නුවන් ප්‍රදීප් ප්‍රමුඛ කැන්ඩි පන්ඳු යවන්නන් සමත් වීමෙන් දඹුල්ල කණ්ඩායම මහත් අසීරුතාවකට පත්විය. සදීරගේ කඩුල්ල දවාගනිමින් පළමු කඩුල්ලේ සම්බන්ධතාවට තිත තැබීමට චතුරංග ද සිල්වා සමත් වෙද්දී, අවිෂ්ක සහ ලක්ෂාන් පිටියෙන් ඉවත් කිරීමට මුජිබුර් රහමාන් සමත් විය.

ඉන් අනතුරුව ධනංජය ද සිල්වාගේ සහ ඇලෙක්ස් රොස්ගේ කඩුළු බිඳ දැමීමට නුවන් ප්‍රදීප් සමත් වූවා. එහෙත් බෙන් මැක්ඩමොඩ් පන්දු 23 කදී හයේ පහර 2 ක් සහ හතරේ පහර 3 ක් සමග ලකුණු 37 ක්ද, හේඩ්න් කේර් පන්දු 16 කදී හයේ පහරක් සහ හතරේ පහර 3 ක් සමග ලකුණු 26 ක්ද රැස්කරමින් දඹුල්ල කණ්ඩායම තර​ඟයක් දිය හැකි ලකුණු සංඛ්‍යාවක් කරා ගෙන ආහ.

පෙර තර​ඟයේදී විවේක ගන්වා සිටි දිනේෂ් චන්දිමාල් සහ මුජිබුර් රහමන් මෙම තරගයේදී යළිත් බී-ලව් කැන්ඩි කණ්ඩායමට ඇතුළත්ව සිටි අතර දඹුල්ල කණ්ඩාම නායක කුසල් මෙන්ඩිස් විවේක ගන්වමින් නවක ක්‍රීඩකයන් රැසක් සමග මෙම තර​ඟයට ක්‍රීඩා කළහ. එහිදී ධනංජය ද සිල්වා විසින් දඹුල්ල අවුරා කණ්ඩායම මෙහෙයවනු ලැබිණ.