යුක්රේනය හා රුසියාව සමඟ පවතින අඛන්ඩ ගැටුම අතරතුර රටේ සෞඛ්‍ය අංශයට සහාය වීම සඳහා එක්සත් අරාබි එමීර් රාජ්‍යය විසින් ගිලන්රථ 23ක් රැගත් නෞකාවක් යුක්රේනය වෙත යවා ඇත. ලොව පුරා අවශ්‍යතා ඇති රටවලට ආධාර කිරීම සඳහා එක්සත් අරාබි එමීර් රාජ්‍යයේ මානුෂීය මෙහෙයුමේ කොටසක් ලෙස පසුගියදා ගිලන්රථ නැව්ගත කල බව රාජ්‍ය ප්‍රවෘත්ති ඒජන්සිය වාර්තා කළේය.
යුක්රේනයේ, එක්සත් අරාබි එමීර් රාජ්‍ය තානාපති සාලෙම් අහමඩ් සාලෙම් අල් කාබි පැවසුවේ යුක්රේන ජනතාවට සහන සැලසීම සඳහා එක්සත් අරාබි එමීර් රාජ්‍යය අඛණ්ඩව සහන කටයුතු සිදුකරන බවයි.
ජාත්‍යන්තර කටයුතු පිළිබඳ කාර්යාලයේ මානුෂීය සහය සහ ආධාර පිළිබඳ අධ්‍යක්ෂ මජිඩ් බින් කමල් පවසන පරිදි, එක්සත් අරාබි එමීර් රාජ්‍යය එහි දැනට ක්‍රියාත්මක විදේශ ආධාර වැඩසටහනේ කොටසක් ලෙස යුක්රේනයට සහය දැක්වීම සඳහා ගිලන්රථ 50ක් යැවීමට අපේක්ෂා කරයි.
පසුගිය මාසයේ, UAE විසින් යුක්රේන සිසුන්ට උපකාර කිරීම සඳහා පාසල් බෑග් 10,000 ක්, ලැප්ටොප් පරිගණක 2,500 ක්, පුද්ගලික සැපයුම්, ආලෝක උපකරණ සහ බ්ලැන්කට් ඇතුළු ආධාර ටොන් 250 ක ආධාර ගුවන් යානයක් මගින් යුක්රේනයට යවන ලදී.
2022 ඔක්තෝම්බර් මාසයේදී එක්සත් අරාබි එමීර් රාජ්‍යය ජනාධිපති අතිගරු ෂෙයික් මොහොමඩ්ගේ නියෝගයකට අනුව යුක්රේනයට ඩොලර් මිලියන 100 ක මානුෂීය ආධාර ලබා දීමට පොරොන්දු විය.
ෂෙයික් මොහොමඩ් යුක්රේන ජනාධිපති Volodymyr Zelenskyy සමඟ කතා කිරීමෙන් දිනකට පසුව මෙම පියවර නිවේදනය කලේය. රුසියාව සමඟ ගැටුමේ බලපෑම අවම කිරීම සඳහා එක්සත් අරාබි එමීර් රාජ්‍යය මානුෂීය සහ ආර්ථික ආධාර අඛණ්ඩව ලබා දෙන බව ෂෙයික් මොහොමඩ් එහිදී පැවසීය.
