ඩුබායි පොලිසිය මාර්ග අනතුරු වාර්තා කිරීම පහසු කරවන නව කෘත්‍රිම බුද්ධියෙන් ක්‍රියාත්මක වන පද්ධතියක් හඳුන්වා දීමට සූදානම් වේ. පොලිසියට කාලය හා සම්පත් ඉතිරි කරමින් හදිසි අනතුරකදී වැරදිකරු වූයේ කවුරුන්ද යන්න මෙම තාක්ෂණය මගින් තීරණය කරනු ඇත. සංඛ්‍යා ලේඛනවලට අනුව, එය අතින් කරණා කාර්‍යයන් සහ ක්‍රියාවලීන්ගෙන් 50% ක් අඩු කරනු ඇත.
Gitex තාක්‍ෂණ සතියේදී හෙළිදරව් කරන ලද මෙම නව තාක්ෂණය ඩුබායි පොලිස් යෙදුම හරහා එළිදැක්වීමට නියමිත අතර ඉතා ඉක්මනින් මහජනතාවට ලබා ගත හැකිය.
“එය 90% ක් පමණ නිමවා අවසන් – ඉතිරිව ඇති සුළු ගැටළු නිරාකරණය කළ පසු, එය සියලුම ඩුබායි වැසියන්ට ලබා ගත හැකි වනු ඇත.” ඩුබායිහි පොලිස් ප්‍රකාශකයෙක් පැවසීය.
එය ක්‍රියා කරන ආකාරය
රිය අනතුරු වාර්තා කිරීමට රියදුරන්ට පහසු මාර්ගයක් පද්ධතිය සපයයි. යමෙකු අනතුරකට ලක් වූ විට, ඔවුන්ට ඩුබායි පොලිස් යෙදුමට ඡායාරූප සමඟ දත්ත ඉදිරිපත් කළ හැකිය. පවතින තොරතුරු මත පදනම්ව කෘතිම බුද්ධිය මගින්, වරද කර ඇත්තේ කවුරුන්ද යන්න මැන බැලීමට සහ හානියට පත් ප්‍රදේශ ඉස්මතු කිරීමට හැකි වනු ඇත. මෙම පද්ධතිය විසින් හදිසි අනතුරු වාර්තාවක් ජනනය කරන අතර එය ඩුබායි පොලිසියට අනතුර සිදු කළ අය සඳහා රතු පත්‍රිකාවක් සහ වරදක් නොකළ අයට කොළ පැහැති පත්‍රිකාවක් නිකුත් කිරීමට උපකාරී වේ.
පොලිස් ප්‍රකාශකයෙකුට අනුව, කෘතිම බුද්ධිය පොලිස් නිලධාරීන්ට අනතුරු සහ එය සිදු වූ ආකාරය පිළිබඳව වඩා හොඳ අවබෝධයක් ලබා ගැනීමට උපකාරී වනු ඇත.
මීට පෙර රිය අනතුරකට ලක් වූ පුද්ගලයන්ට සිදුවූයේ පොලිසිය එම ස්ථානයට පැමිණ වරද කාගේදැයි තීරණය කරන තෙක් බලා සිටීමටය. දැන් ඩුබායි රියදුරන්ට යෙදුම භාවිතයෙන් අනතුරු වාර්තා කිරීමට හා ඡායාරූප උඩුගත කිරීම පහසුය. කෙසේ වෙතත්, වරද කාගේද යන්න පිළිබඳව මතභේද ඇති වූ විට, ඔවුන්ට තවමත් පොලිස් ස්ථානයට පැමිණීමට අවශ්‍ය වේ.
මේ වසර මුලදී, ‘On The Go’ නමින් ඩුබායි පොලිසිය මගින් නව වැඩසටහනක් දියත් කරන ලද අතර එමඟින් රියදුරන්ට ඉන්ධන පිරවුම්හල්වලින් හදිසි අනතුරු වාර්තාවක් ලබා ගැනීමට සහ ඔවුන්ගේ වාහනය වහාම අලුත්වැඩියා කිරීමට ඉඩ සැලසීය.
