WhatsApp, නුදුරේදීම පරිශීලකයින්ට තනි දුරකථනයකින් WhatsApp ගිණුම් දෙකක් ක්‍රියාත්මක කිරීමට ඉඩ ලබා දීමට නියමිතයි. WhatsApp පරිශීලකයින් දිගු කලක් බලා සිටි මෙම විශේෂාංගය මෙටාහි නිර්මාතෘ මාර්ක් සකර් බර්ග් විසින් නිවේදනය කරන ලද අතර නිල සමාගම් බ්ලොග් සටහනකින් තහවුරුකොට තිබේ.
සකර් බර්ග් පැවසුවේ “ඉක්මනින් එක් දුරකථනයක, WhatsApp යෙදුම තුළ ගිණුම් දෙකක් තබා ගැනීමට හැකි වනු ඇත”
දැනට, WhatsApp ගිණුම් දෙකක් ක්‍රියාත්මක කිරීමට අවශ්‍ය පුද්ගලයින්ට, ගිණුම් වලට ඇතුළු වීමට සහ පිටතට යාමට වෙන වෙනම දුරකථන රැගෙන යාමට අවශ්‍ය වී ඇත.
නව විශේෂාංගය පිළිබඳව නිවේදනය කරන WhatsAppහි බ්ලොග් අඩවියේ, පණිවුඩකරණ සේවාව මෙසේ පැවසීය: “අද, අපි එකවර WhatsApp ගිණුම් දෙකක් ලොග් වීමේ හැකියාව හඳුන්වා දෙන්නෙමු.”
“ඔබේ රාජකාරි ගිණුම සහ පුද්ගලික ගිණුම අතර මාරුවීම සඳහා මෙය ප්‍රයෝජනවත් වේ – දැන් ඔබට තවදුරටත් සෑම අවස්ථාවකම ලොග් අවුට් වීමට හෝ දුරකථන දෙකක් රැගෙන යාමට හෝ වැරදි තැනකින් පණිවිඩ යැවීම ගැන කරදර වීමට අවශ්‍ය නැත”
“දෙවන ගිණුමක් සෑදීමට, ඔබට දෙවන දුරකථන අංකයක් සහ SIM කාඩ්පතක් හෝ SIM කාඩ් දෙකක් සහිත හෝ eSIM පිළිගන්නා දුරකථනයක් අවශ්‍ය වේ.
“සරලව ඔබගේ WhatsApp settings විවෘත කරන්න, ඔබගේ නමට යාබද ඊතලය මත ක්ලික් කරන්න, සහ ‘ගිණුම එක් කරන්න’ (Add account) මත ක්ලික් කරන්න.
“ඔබට එක් එක් ගිණුමේ ඔබගේ පෞද්ගලිකත්වය සහ දැනුම්දීම් (privacy and notification) සැකසීම් පාලනය කළ හැක”.
WhatsAppහි ප්‍රකාශය මගින් තවදුරටත් පවසන්නේ පරිශීලකයින්ට නිල යෙදුම පමණක් භාවිතා කරන ලෙසයි. දුරකථනයට තවත් ගිණුම් එකතුකර ගැනීමේ මාර්ගයක් ලෙස අනුකරණ හෝ ව්‍යාජ අනුවාද බාගත නොකරන ලෙසද අවවාද කොට ඇත. නිල යෙදුම භාවිතා කරන විට පමණක් පණිවිඩ ආරක්ෂිත සහ පෞද්ගලිකත්වය රැකෙන බවද එය පැහැදිලි කළේය.
හඳුන්වාදෙන නව WhatsApp ක්‍රියාකාරීත්වය ලොව පුරා නිකුත් කිරීම සඳහා කාල රාමුවක් ලබා දී නැත, නමුත් එය ඉදිරි සතිවලදී Android සහ iPhone භාවිතා කරන්නන් සඳහා අපේක්ෂා කෙරේ.
WhatsApp යෙදුම මෑතකදී පින්තූර බෙදාගැනීම, හඬ ඇමතුම් සහ පණිවිඩය වෙනස් කිරීම සඳහා යාවත්කාලීන කිරීම් ඇතුළුව නව විශේෂාංග රාශියක් එක් කොට තිබේ.
