එක්සත් අරාබි එමීර් රාජ්‍යයේ 52 වන ජාතික දිනය සැමරීමේ කොටසක් ලෙස, උම් අල් කුවේන් පොලිස් විධානය නොවැම්බර් 1 ට පෙර නිකුත් කරන ලද රථවාහන දඩ සඳහා 50% ක වට්ටමක් ලබා දී තිබෙනවා. නියමිත කාලසීමාව සඳහා වාහන අත්අඩංගුවට ගැනීම සහ traffic points ලබා දීමද නොකරන බව පොලිසිය නිවෙදනය කොට තිබෙනවා.
රථවාහන දඩ, දෙසැම්බර් 1 සහ 2024 ජනවාරි 7 අතර ගෙවීමේදී මෝටර් රථ හිමියන්ට මෙම වට්ටම් ලබා ගත හැක.
මෙම වට්ටම් ලබාදීම උම් අල් කුවේන්හි සිදු කරන ලද සියලුම මාර්ග නීති කඩකිරීම් සඳහා වන අතර, පහත දැක්වෙන බරපතල උල්ලංඝනය කිරීම් සඳහා අදාල නොවේ.
- රියදුරුගේ ජීවිතයට හෝ අන් අයගේ ජීවිත වලට අනතුරු සිදුවන අයුරින් අපරික්ෂාකාරීව වාහනයක් පැදවීම.
- පොදු හෝ පෞද්ගලික පහසුකම් වලට හානි සිදු විය හැකි ආකාරයෙන් වාහනයක් පැදවීම.
- රතු මාර්ග සංඥාවේදී ධාවනය
- පැයට කිලෝමීටර් 80 ට වඩා වැඩි වේගයකින් පළ කර ඇති වේග සීමාව ඉක්මවීම.
- බලපත්‍රයක් නොමැතිව වාහනයේ එන්ජිම හෝ චැසිය වෙනස් කිරීම.
වට්ටම් කාලය තුළ දඩ මුදල් ගෙවීම අභ්‍යන්තර කටයුතු අමාත්‍යාංශයේ සහ උම් අල් කුවේන් පොලිසියේ ස්මාර්ට් යෙදුම හරහා සහ අභ්‍යන්තර කටයුතු අමාත්‍යාංශයේ වෙබ් අඩවියේ සහ ‘Sahl’ ඉලෙක්ට්‍රොනික උපාංගවල විද්‍යුත් ගෙවීම් හරහා හෝ උම් අල් කුවේන් පොලිස් සේවා මධ්‍යස්ථානවලදී පුද්ගලිකව සිදු කළ හැකිය.
මෙම තීරණය පැමිණෙන්නේ උල්ලංඝනය කරන්නන්ට දඩ ගෙවීමට පහසුකම් සැලසීමටය. දඩ මුදල් ගෙවීම කඩිනම් කරන ලෙසත්, නියමිත කාලසීමාව තුළ ලබාදී ඇති වට්ටමෙන් ප්‍රයෝජන ගන්නා ලෙසත්, සියලුම මාර්ග නීති රීති පිළිපදිමින් උල්ලංඝනය කිරීම් හා අනතුරුවලින් වළකින ලෙසත් උම් අල් කුවේන් පොලිසිය වාහන හිමියන්ගෙන් ඉල්ලා සිටී.
