එමිරේට්ස් ගුවන්සේවය, පවතින අයහපත් කාලගුණික තත්ත්වයන් හේතුවෙන් ඉන්දියාවේ සහ යුරෝපයේ ඇතැම් ගමනාන්ත වෙත සිය ගුවන් ගමන් අවලංගු කරන බව නිවේදනය කොට තිබෙනවා. යුරෝපයේ ඇතැම් ප්‍රදේශවලට ඇතිවී තිබෙන දැඩි හිම පතනය හේතුවෙන් ජර්මනියේ මියුනිච් වෙත ගුවන් ගමන් නවතා දමා තිබෙනවා. මේ අතර, කලාපයේ පවතින අධික වර්ෂාව හේතුවෙන් ඩුබායි පදනම් කරගත් ගුවන් සේවය ඉන්දියාවේ චෙන්නායි වෙතද ගුවන් ගමන් අත්හිටුවා ඇත.
මේ අනුව, දෙසැම්බර් 5 අඟහරුවාදා සහ දෙසැම්බර් 6 බදාදා යන දින දෙක සඳහා මියුනිච් වෙත ගුවන් ගමන් අවලංගු කර ඇත. මියුනිච් නගරය මේ වන විට දැඩි හිම පතනයක් අත්විඳිමින් සිටින අතර, එය නගරය වටා ගමනාගමනයට මෙන්ම ජාත්‍යන්තර ගුවන් තොටුපළ තුළට සහ ඉන් පිටත ගුවන් ගමන්වලටද බලපෑම් එල්ල කොට තිබෙනවා.
එමිරේට්ස් නිවේදනය කලේ, “මියුනිච් වෙත ඉදිරි සම්බන්ධතා ඇති එමිරේට්ස් ගුවන් ගමන්වල පාරිභෝගිකයින් දෙසැම්බර් 5 සහ දෙසැම්බර් 6 යන දිනවලදී ඔවුන්ගේ මූලාරම්භක ගමන් සඳහා පිළිගනු නොලැබේ. අපි තත්ත්වය සමීපව නිරීක්ෂණය කරමින් සිටින අතර අපගේ මෙහෙයුම් සඳහා තවත් වෙනස්කම් තිබේ නම් පාරිභෝගිකයින්ට හැකි තරම් දැනුම් දීම අපගේ අරමුණයි.”
මේ අතර, පවතින අධික වර්ෂාපතනය සහ චෙන්නායිහි ගංවතුර හේතුවෙන් එමිරේට්ස්, චෙන්නායි නගරය වෙත ගුවන් ගමන් කීපයක් අවලංගු කර ඇත. දෙසැම්බර් 4 වන සඳුදා ගුවන් ගමන් හතරක් අවලංගු කරන ලද අතර, දෙසැම්බර් 5 වැනිදා ඩුබායි ජාත්‍යන්තර ගුවන් තොටුපළේ සිට චෙන්නායි ජාත්‍යන්තර ගුවන් තොටුපළ දක්වා EK544 ගුවන් යානයත්, දෙසැම්බර් 5 වැනිදා චෙන්නායි ජාත්‍යන්තර ගුවන් තොටුපළේ සිට ඩුබායි ජාත්‍යන්තර ගුවන් තොටුපළ වෙත ගුවන් ගමන් වාරයත් අවලංගු කල බව නිවේදනය කරනු ලැබුවා.
ගුවන් සමාගම පැවසුවේ, “චෙන්නායි වෙත ඉදිරි සම්බන්ධතා ඇති එමිරේට්ස් ගුවන් ගමන් වල, පාරිභෝගිකයින් ඔවුන්ගේ මූලාරම්භක ගමන් සඳහා පිළිගනු නොලැබේ. පවතින තත්ත්වය පිළිබඳව අප සමීපව නිරීක්ෂණය කරමින් සිටින අතර අපගේ මෙහෙයුම්වල ඉදිරි වෙනස්කම් තිබේ නම් පාරිභෝගිකයින්ට හැකිතාක් දැනුම් දීම අපගේ අරමුණයි” සිදු වූ යම් අපහසුතාවයක් ගැන කනගාටු වන බව පවසන ගුවන් සමාගම, අපහසුතාවයට පත් පාරිභෝගිකයන් නැවත ආසන වෙන්කරවා ගැනීමේ විකල්ප සඳහා ඔවුන්ගේ වෙන් කිරීමේ නියෝජිතයන් හෝ ප්‍රාදේශීය එමිරේට්ස් කාර්යාලය හා සම්බන්ධ විය යුතු බව පැවසීය.
