ශ්‍රී ලංකාවේ ප්‍රමුඛතම ගමනාන්ත කළමනාකරණ සමාගමක් වන එයිට්කන් ස්පෙන්ස් ට්‍රැවල්ස්, දෙසැම්බර් 10 අද දින කොළඹ වරායට පැමිණෙන Vasco Da Gama, Mein Schiff 5, සහ MS Seven Seas Navigator යන කෲස් නෞකාවන් තුනක් එකවර පිළිගනීමට සූදානමින් සිටී.
Vasco Da Gama සහ Mein Schiff 5 කොළඹ වරායට පෙරවරු 7.00 වන විටද, MS Seven Seas Navigator පස්වරු 1.30 ට ද කොළඹ නැව් තටාකයට ලඟාවීමට නියමිතයි. එක් දිනක් තුළ යාත්‍රා තුනෙන්ම ආසන්න වශයෙන් සංචාරකයින් 4,000ක් පමණ පැමිණෙනු ඇති බව සමාගමේ ප්‍රවෘත්ති නිවේදනයක දැක්වේ.
“විශේෂයෙන්, Vasco Da Gama නෞකාව ශ්‍රී ලංකාවට සිය මංගල ගමන සනිටුහන් කරන අතර, එහි මගීන්ට ත්‍රිකුණාමලය වරායෙන් පිටත්වීමට පෙර කොළඹ නගරයේ සුවිශේෂී ස්ථාන නැරඹීමේ අවස්ථාව උදාවෙනු ඇත. ඔවුන් මින්නේරිය, දඹුල්ල, සීගිරිය, පොළොන්නරුව වැනි ප්‍රදේශවල ආශ්චර්යයන් සහ නැගෙනහිර වෙරළ තීරයේ සිත් ඇදගන්නා දර්ශන ගවේෂණය කරනු ඇත
මීට අමතරව, දෙසැම්බර් 17 වනදා වන විට MS Nautica කෲස් නෞකාවේ පැමිණීම සමාගම අපේක්ෂා කරයි. මෙම යාත්‍රාව දින තුනක් ශ්‍රී ලංකාවේ මුහුදු තීරයේ සැරිසැරීමට නියමිත අතර, කොළඹ සහ හම්බන්තොට වරායන්හි නැංගුරම්ලෑමට නියමිතයි.
Aitken Spence Travels ශ්‍රී ලංකාවේ විවිධ භූ දර්ශන සහ පොහොසත් සංස්කෘතියේ නියැලීමට සියලුම සංචාරකයින්ට ආරාධනා කරමින්, විස්තීර්ණ විනෝද චාරිකා රැසක් ලබාදීමට කැපවී සිටී. සමාගම කොළඹ, හම්බන්තොට සහ ත්‍රිකුණාමලය වරායන් වෙත සංචාරකයින් ගෙන්වා ගැනීමට විවිධ සංචාරක නියෝජිතයන් සමඟින් කටයුතු කරමින් සිටින අතර 2023 දෙසැම්බර් අවසානය දක්වා කෲස් සංචාරක නෞකාවන් 14ක් පිළිගැනීමට නියමිතය.
මෙම සුවිශේෂී ජයග්‍රහණය පිළිබඳව අදහස් දක්වමින් Aitken Spence Travels හි කළමනාකාර අධ්‍යක්ෂ නලින් ජයසුන්දර මහතා ප්‍රකාශ කළේ “මෙම මාස දෙක තුළ මගීන් 10,000 කට අධික පිරිසකට සේවා සැපයීමට අපි බලාපොරොත්තු වෙනවා. මෙම සියලුම කෲස් ක්‍රියාකරුවන් ශ්‍රී ලංකාව ඔවුන්ගේ යාත්‍රා ගමන් මාර්ගවල කොටසක් ලෙස තෝරා ගැනීම ගැන අපි සතුටු වෙමු.”
“අපි ආක්‍රමණශීලී ලෙස ගමනාන්තය ප්‍රවර්ධනය කරමින් සිටින අතර ශ්‍රී ලංකාව තෝරා ගැනීම සඳහා ගමනාන්තය පිළිබඳ විශ්වාසය ගොඩනැගීම සඳහා ක්‍රියාකරුවන් සමඟ අඛණ්ඩව කටයුතු කරමින් සිටිමු.”
