මානව සම්පත් සහ එමරාතීකරණ අමාත්‍යාංශය (MoHRE) විසින් සේවා යෝජකයින් 153 දෙනෙකුගේ ලිපිගොනු අවහිර කර ඇති අතර, ඔවුන්ගේ ගෘහ සේවිකාවන් අන් අය වෙනුවෙන් සේවය කිරීමට ඉඩ සලසා නීති උල්ලංඝණය කිරීමක් සිදුකොට ඇති බැවින් ඔවුන්ට දඩ මුදල්ද නියම කොට තිබෙනවා.
මෙය මානව සම්පත් සහ එමරාතීකරණ අමාත්‍යාංශය සහ හැඳුනුම්පත, පුරවැසිභාවය, රේගුව සහ වරාය ආරක්ෂාව සඳහා වූ ෆෙඩරල් අධිකාරිය අතර පසුගිය මාස දෙක තුළ රට පුරා අනුකූල නොවන කම්කරුවන් පරීක්ෂා කිරීම සඳහා ක්‍රියාත්මක කළ ඒකාබද්ධ මෙහෙයුම්වල ප්‍රථිඵලයකි.
දැඩි දඬුවම්
සේවා යෝජකයන්, සීමා කිරීම්වලට යටත්ව ඔවුන්ගේ නව ගෘහ සේවක බලපත්‍ර ප්‍රතික්ෂේප කිරීම ඇතුළු පරිපාලන දඬුවම්වලට මුහුණ දෙනු ඇති අතර, ඔවුන්ට එරෙහිව අවශ්‍ය නෛතික හා මූල්‍ය ක්‍රියාමාර්ග ගැනීමට නීතිපති දෙපාර්තමේන්තුව වෙත යොමු කිරීම සහ උල්ලංඝණයන් සඳහා ඩිරාම් 50,000 දක්වා දඩයක් පැණවීමද ඇතුළත් වේ.
මෙම ක්‍රියාමාර්ග ගෘහ සේවිකාවන් සම්බන්ධ 2022 අංක 9 දරන ෆෙඩරල් ආඥා පනතට සහ එහි විධායක රෙගුලාසිවලට අනුකූල වන අතර එමගින් රැකියා බලපත්‍ර නොමැතිව ගෘහ සේවිකාවන් සේවයේ නියුක්ත කිරීම තහනම් වන අතර අදාළ කොන්දේසිවලට අනුකූල නොවී, එම තත්ත්වයන් නිරාකරණය නොකර, වෙනත් අය සඳහා වැඩ කිරීමට ඉඩ සැලසීමේදී, ඔවුන් සේවයේ යොදවන සමාගම්වලට එරෙහිව ද එම පියවර අණුගමනය කරනු ඇත.
නීති විරෝධී ලෙස කම්කරුවන් බඳවා නොගන්න
නීතිවිරෝධී ගෘහ සේවිකාවන් බඳවා ගැනීමට හෝ ඔවුන්ගේ තත්ත්වය නිරාකරණය නොකර වෙනත් අය සඳහා සේවය කිරීමට ගෘහ සේවිකාවන් බඳවා ගැනීමට එරෙහිව සේවා යෝජකයන්ට අනතුරු අඟවමින් එමරාතීකරණ අමාත්‍යාංශය නිවේදනයක් නිකුත් කළේය. “මෙය පැහැදිලිවම නීති උල්ලංඝණය කිරීමක් වන අතර සේවායෝජකයන්ට සහ ඔවුන්ගේ පවුල්වලට සෞඛ්‍ය හා සමාජීය අවදානම් ඇති කරයි” යනුවෙන් එමරාතීකරණ අමාත්‍යාංශය පැවසීය.
කොන්දේසි කඩකරන්නන්ට එරෙහිව නීතිය ක්‍රියාත්මක කිරීම සම්බන්ධයෙන් කිසිදු සහනයක් ලබා නොදෙන බවද අමාත්‍යාංශය වැඩිදුරටත් සඳහන් කළේය.
“එමරාතීකරණ අමාත්‍යාංශයෙහි නිල වෙබ් අඩවියේ සහ සමාජ මාධ්‍ය පිටු වල ලැයිස්තුගත කර ඇති බලපත්‍රලාභී ගෘහ සේවිකාවන් බඳවා ගැනීමේ නියෝජිතායතන සමග පමණක් ගනුදෙනු කරන ලෙස අපි සේවා යෝජකයින්ගෙන් ඉල්ලා සිටිමු,” නිවේදනයේ පැහැදිලි කොට ඇත.
ගෘහ සේවක බඳවා ගැනීමේ නියෝජිතායතන සම්බන්ධයෙන් සෘණාත්මක භාවිතයන් හෝ ප්‍රතිචාරයන් එමරාතීකරණ අමාත්‍යාංශයේ 600590000 ඇමතුම් මධ්‍යස්ථානයට වාර්තා කරන ලෙස පාරිභෝගිකයින් දිරිමත් කරයි.
