ජාතික බැඩ්මින්ටන් ශූරී රනිත්මා ලියනගේ සාන්ත ඩෙනිස් රියුනියන් ජාත්‍යන්තර විවෘත බැඩ්මින්ටන් ශූරතාවලියේ කාන්තා ඒකල තරග අංශයේ දෙවැනි වටයට සුදුසුකම් ලබා ගත්තාය.
ප්‍රංශයට අයත් රියුනියන් දූපත් රාජ්‍යයේ සාන්ත ඩෙනිස් අගනුවර පැවැත්වෙන මේ ශූරතාවලියේදී රනිත්මා දෙවැනි වටයට පිවිසියේ කාන්තා ඒකල පළමු වටයේදී මිනිත්තු 14ක් ඇතුළත ප්‍රතිවාදී ක්‍රීඩිකාව වන මැඩගස්කර් ක්‍රීඩිකා ලාලිසියාරසෝලොනොයිලිනා ලකුණු 21-3ක් සහ 21-5ක් ලෙස පරාජය කරමිනි.
ලෝක බැඩ්මින්ටන් කාන්තා ශ්‍රේණිගත කිරීම්වල 183 වැනි ස්ථානයේ පසුවන 17 හැවිරිදි රනිත්මා දෙවැනි වටයේදී රියුනියන් දූපත් රාජ්‍යයේ එමානුවෙලි ආමෙටි සමඟ තරග වැදීමට නියමිතයි.
ලෝක බැඩ්මින්ටන් සම්මේලනයේ වාර්ෂික තරග කැලැන්ඩරයේ ප්‍රමුඛතම තරගාවලියක් වන සාන්ත ඩෙනිස් රියුනියන් ජාත්‍යන්තර විවෘත බැඩ්මින්ටන් ශූරතාවලියේ ජයග්‍රාහක ජයග්‍රාහිකාවන්ට අමෙරිකානු ඩොලර් විසිපන්දහසක මුදල් ත්‍යාග පිරිනැමෙන අතර, ලෝක බැඩ්මින්ටන් ශ්‍රේණිගත කිරිම්වල පළමු 50 දෙනා අතර සිටින විශිෂ්ටතම ක්‍රීඩක ක්‍රීඩිකාවෝ එක් වී සිටිති.
