මෙවර පාර්ලිමේන්තු මැතිවරණයට ඉදිරිපත් වූ ශ්‍රී ලංකා කණ්ඩායමේ හිටපු ක්‍රිකට් නායක ටී.එම්. ඩිල්ෂාන් හා ජාතික තලයේ ක්‍රීඩා කළ ක්‍රීඩකයන් කිහිපදෙනකුම පරාජයට පත්ව තිබේ. හිටපු වොලිබෝල් ක්‍රීඩකයෙකු වන ශාන්ත බණ්ඩාර මහතා කුරුණෑගල දිස්ත්රික්කයෙන් ගෑස් සිලින්ඩරය යටතේ තරග කොට පරාජයට පත්වූ අතර, ශ්‍රී ලංකා මලල ක්‍රීඩා සංගමයේ හිටපු උපසභාපති හා මීටර් 100 ජාතික තලයේ හිටපු ක්‍රීඩක අනිල් වීරසිංහ මහතා පුත්තලම දිස්ත්රික්කයෙන් පොහොට්ටුව යටතේ තරග කොට පරාජයට පත් විය.
මෙයට අමතරව මෑතකදී මලල ක්‍රීඩාවෙන් විශ්‍රාම ගත් ෂෙහාන් අඹේපිටිය ‘පදක්කම’ යටතේ ජාතික ලැයිස්තුවෙන් ඉදිරිපත් වී සිටියද ඔහුට ද අවස්ථාවක් හිමි නොවනු ඇතැයි වාර්තා වේ.
කළුතර දිස්ත්රික්කයෙන් ‘මයික්‍රෆෝනය’ යටතේ තරග කළ හිටපු ක්‍රිකට් නායක ටී.එම්. ඩිල්ෂාන් මහතා නියෝජනය කල පක්ෂයට කළුතර දිස්ත්‍රික්කයෙන්ම ලැබී ඇති මුළු ඡන්ද සංඛ්‍යාව 7090ක් පමණි. එය 1.04%ක පමණ සුළු ප්‍රතිශතයක් වීම කැපී පෙනේ. ශ්‍රී ලංකාව වෙනුවෙන් ටෙස්ට් තරග 87කට හා එක්දින තරග 330කට සහභාගිවූ ඩිල්ෂාන් විස්සයි20 තරග 80කට ක්‍රීඩා කළේය. නමුත් මෙවර මැතිවරණයේදී ජනතාව පුද්ගල ජනප්‍රියත්වයට ප්‍රතිචාර දක්වා නැති බව පැහැදිලි වේ.
