පාරිසරික හා සමාජමය වෙනසක් ඇති කරමින් සදාචාරාත්මකව පිරිසුදු රටක් නිර්මාණය කිරීමේ අරමුණ පෙරදැරිව අරඹන ‘ක්ලීන් ශ්‍රී ලංකා’ (Clean Sri Lanka) වැඩසටහන ජනාධිපති අනුර කුමාර දිසානායක මහතාගේ ප්‍රධානත්වයෙන් ජනාධිපති කාර්යාලයේදී අද (01) ආරම්භ කෙරේ.
පක්ෂ පාට භේදයකින් තොරව පුළුල් ජාතික වැඩසටහන ඔස්සේ ආකල්පමය, හැසිරීමේ සහ ගුණාත්මක වෙනසක් ඇති කර අලුත් වටිනාකමක් සහිත රටක්, ලස්සන ජීවිතයක් සමස්ත පුරවැසියන්ට උරුම කර දීමට මෙම වැඩසටහන ක්‍රියාත්මකය.
‘පොහොසත් රටක් – ලස්සන ජීවිතයක්’ නිර්මාණය කිරීම සඳහා රජය ක්‍රියාත්මක කරනු ලබන ‘ක්ලීන් ශ්‍රී ලංකා’ ජාතික වැඩසටහනට සමගාමීව නව වසරේ රාජකාරි ආරම්භ කරන ලෙස අමාත්‍යාංශ ලේකම්වරුන්ට, පළාත් ප්‍රධාන ලේකම්වරුන්ට, දෙපාර්තමේන්තු ප්‍රධානීන්ට හා රාජ්‍ය සංස්ථා හා ව්‍යවස්ථාපිත මණ්ඩල ප්‍රධානීන්ට රාජ්‍ය පරිපාලන පළාත් සභා හා පළාත් පාලන අමාත්‍යාංශය විශේෂ චක්‍රලේඛයක් මඟින් ද දැනුම් දී තිබේ.
මහජන අභිලාෂ සම්පූර්ණ කිරීමට, මහජනතාවට කාර්යක්ෂම හා ඵලදායී රාජ්‍ය සේවාවක් ලබා දීම හා සමස්ත රාජ්‍ය සේවයම තිර අදිටනින් කැප විය යුතු බැවින් ඊට සමගාමීව සියලු රාජ්‍ය ආයතනවල හා කාර්යාලවල එකම වේලාවට එකම න්‍යායපත්‍රයක් යටතේ වැඩ ඇරඹීමේ උත්සවය පැවැත්වෙයි.
එම උත්සවයේදී උදේ 8.30ට ජාතික ධජය එසවීම, ජාතික ගීය ගායනා කිරීම හා රට වෙනුවෙන් මිය ගිය සියලු දෙනා සැමරීමට මිනිත්තු දෙකක නිශ්ශබ්දතාවක් පැවැත්වීම හා උදේ 9.00ට ජනාධිපති කාර්යාලයේ සිට ජනමාධ්‍ය ඔස්සේ විකාශනය කෙරෙන ‘ක්ලීන් ශ්‍රී ලංකා’ ජාතික වැඩසටහන සමඟ සම්බන්ධ වෙමින් ‘ක්ලීන් ශ්‍රී ලංකා’ ප්‍රතිඥාව දීමේ අවස්ථාවට සජීවීව සම්බන්ධ විය යුතු බවත් රාජ්‍ය පරිපාලන, පළාත් සභා සහ පළාත් පාලන අමාත්‍යාංශ ලේකම් එස්. ආලෝක බණ්ඩාර මහතාගේ අත්සනින් ඒ සම්බන්ධයෙන් නිකුත් කළ නිවේදනයේ වැඩිදුරටත් දැක්වෙයි.
