ජපානයේ සාත්තු සේවා රැකියා සඳහා ශ්‍රී ලාංකික ශ්‍රමිකයන්ගේ පුහුණු සංචිතයක් පිහිටුවීමට විදේශ සේවා නියුක්ති කාර්යංශය සහ ජපානයේ IM Japan ආයතනය අතර සාකච්ඡාවකදී තීරණයට එළඹ තිබේ.
ජපානයේ සාත්තු සේවා රැකියා ක්ෂේත්‍රය සඳහා වැඩි පුරප්පාඩු ප්‍රමාණයක් තිබෙන හෙයින් මෙම තීරණයට එළඹ ඇත.
ශ්‍රි ලාංකිකයින් ජපානයේ රැකියා සඳහා යොමු කිරිමේ ඉදිරි වැඩපිළිවෙල සම්බන්ධයෙන් සාකච්ඡා කිරීම සඳහා ශ්‍රි ලංකා විදේශ සේවා නියුක්ති කාර්යාංශයේ සභාපති කෝශල වික්‍රමසිංහ සහ ජපානයේ IM Japan ආයතනයේ සභාපති කනමොරි හිතොෂි මහත්වරුන් අතර විදේශ සේවා නියුක්ති කාර්යාංශයේ දී මෙම සාකච්ඡාව පැවැත්විණි.
සාත්තු සේවයට අමතරව අනෙකුත් ක්ෂේත්‍ර සඳහා ද රැකියා අවස්ථා ශ්‍රී ලංකාවට ලබා ගැනීමට අවශ්‍ය පියවර ගන්නා ලෙස මෙහිදී විදේශ සේවා නියුක්ති කාර්යාංශ සභාපති කෝෂල වික්‍රමසිංහ මහතා මෙහිදී ජපාන නියෝජිතයින්ගෙන් ඉල්ලා සිටියේය.
ඉදිරියේදී ශ්‍රී ලංකාවට වැඩිපුර ජපන් රැකියා අවස්ථා ප්‍රමාණයක් ලබාදීමට අවශ්‍ය පියවරගන්නා බව කනමොරි හිතොෂි මහතා සඳහන් කළේය.
මෙම සාකච්ඡාවට කාර්යාංශයේ සාමාන්‍යාධිකාරී ඩී.ඩී.පී.සේනානායක, අතිරේක සාමාන්‍යාධිකාරී (ජාත්‍යන්තර කටයුතු) සෙනරත් යාපා IM Japan ආයතනයේ කළමනාකරණ අධ්‍යක්ෂක මසනොබු කොමියා එහි කොළඹ කාර්යාලයේ සාමාන්‍යාධිකාරී හිඩෙටි තමුරා මහත්වරු ඇතුළු පිරිසක් සහභාගී වූහ.
