අමෙරිකාවට භාණ්ඩ අපනයනය කරන සියලු රටවලට බලපෑම් එල්ලවන විශාලතම තීරුබදු ලැයිස්තුවක් ජනාධිපති ඩොනල්ඩ් ට්‍රම්ප් අද (2) නිවේදනය කිරීමට නියමිතය. දැනටමත් තීරුබදු වැඩි කර ඇති රටවලටත් නැවත අදාළ වන පරිදි ජනාධිපතිවරයා සැලසුම් කර ඇති නව තීරු බදු ලැයිස්තුවෙන් ගෝලීය ආර්ථිකයට දැඩි බලපෑම් එල්ල වනු ඇතැයි ගෝලීය ආර්ථික විශේෂඥවරුන් අනාවැකි පළ කර ඇතැයි වාර්තා වේ.
අමෙරිකාවේ භාණ්ඩාගාර ලේකම් ස්කොට් බෙසන්ට් ප්‍රකාශ කර ඇත්තේ අද නිකුත් කිරීමට නියමිත ලැයිස්තුවට අනුව අමෙරිකාවේ විශාලතම වෙළෙඳ ගනුදෙනු සිදුකරන රටවලට 15%කින් තීරුබදු අය කිරීමට ඩොනල්ඩ් ට්‍රම්ප් සැලසුම් කර ඇති බවය. ඒ අනුව දැනටමත් තීරුබදු ඉහළ නංවා ඇති රටවලට නව තීරුබදුවලින් දුෂ්කරතා රැසකට මුහුණ පෑමට සිදුවනු ඇතැයි විදෙස් මාධ්‍ය සඳහන් කරයි.
ඩොනල්ඩ් ට්‍රම්ප්ගේ නව තීරුබදු සංකල්පය ලොව ප්‍රබලතම රටවල් රැසක ආර්ථිකයට බලපානු ඇති අතර, යුරෝපීය රටවලට එය දැඩිව බලපානු ඇතැයි වාර්තා වේ.
ආනයනික තීරුබදු ඉහළ නැංවීමෙන් පසු අමෙරිකාවෙන් ආනයනය කරනු ලබන භාණ්ඩ සඳහා යම් කිසි රටක් තීරු බදු ඉහළ නංවන්නේ නම් එම රටවලට නැවත තීරුබදු පැනවීමට පියවර ගන්නා බවට ද ට්‍රම්ප් අනතුරු අඟවා ඇතැයි සඳහන් ය. අමෙරිකාවට විශාල වශයෙන් භාණ්ඩ අපනයනය කරන රටවල් ලැයිස්තුව මෙතෙක් හෙළි නොකළද, චීනය, යුරෝපා සංගමය, මෙක්සිකෝව, වියට්නාමය, අයර්ලන්තය, ජර්මනිය, තායිවානය, ජපානය, දකුණු කොරියාව, කැනඩාව, ඉන්දියාව, තායිලන්තය, ඉතාලිය, ස්විට්සර්ලන්තය, මැලේසියාව, ඉන්දුනීසියාව, ප්‍රංශය, ඔස්ට්‍රියාව සහ ස්වීඩනය එම රටවල් අතර සිටින බවද වාර්තා වේ. එම රටවලට පනවන බව කියන 15%ක අතිරේක තීරු බද්ද ගෝලීය වෙළෙඳපොළට දරුණු ලෙස බලපානු ඇතැයි වැඩිදුරටත් වාර්තා වේ.
