ඉන්දීය විදේශ කටයුතු අමාත්‍ය එස්. ජයශංකර් මහතා නවදිල්ලියට පැමිණි ශ්‍රී ලංකා පාර්ලිමේන්තු නියෝජිත පිරිසක් ඊයේ(27) හමුවී තිබේ.
ඉන්දියාවේ ප්‍රජාතන්ත්‍රවාදය සඳහා වූ පාර්ලිමේන්තු පර්යේෂණ සහ පුහුණු ආයතනයේ හැකියා වර්ධන වැඩසටහනක් සඳහා සහභාගී වූ එම නියෝජිත පිරිස මෙලෙස ඉන්දීය විදේශ කටයුතු ඇමතිවරයා හමුවී ඇත.
අමාත්‍ය ජයශංකර් ‘X’ ගිණුමෙහි තැබූ සටහනක දැක්වෙන්නේ, ත්‍රස්තවාදය හෙළාදැකීම සහ ඉන්දීය පරිපාලනය යටතේ පවතින කාශ්මීරයේ පහල්ගම් ප්‍රහාරය සම්බන්ධයෙන් ශ්‍රී ලංකා නියෝජිත පිරිස කනගාටුව පළකිරීම පිළිබඳව අගය කරන බවයි.
ශ්‍රී ලංකාවේ සංවර්ධනය සහ ප්‍රගතිය සඳහා සිය කැපවීම නැවත අවධාරණය කළ බවත්, අසල්වැසියන් වශයෙන් ශක්තිමත් මහජන සබඳතා මඟින් පදනම් වූ ප්‍රතිපත්ති සම්බන්ධයෙන් සාකච්ඡා කළ බවත් ඔහු තවදුරටත් පවසයි.
පාර්ලිමේන්තු මන්ත්‍රීවරුන් ඇතුළු ශ්‍රී ලංකා නියෝජිතයෝ 24 දෙනෙක්ගෙන් යුත් මෙම කණ්ඩායම නවදිල්ලියේ පැවති හැකියා වර්ධන වැඩසටහන සඳහා පසුගිය සතියේ ඉන්දියාව බලා පිටත්ව ගියහ.
නියෝජ්‍ය කථානායක ආචාර්ය රිස්වි සාලිගේ නායකත්වයෙන් යුත් මෙම දූත පිරිසට විවිධ දේශපාලන පක්ෂ නියෝජනය කරන පාර්ලිමේන්තු මන්ත්‍රීවරුන් 20 දෙනකු සහ මහලේකම්වරයා ඇතුළු ශ්‍රී ලංකා පාර්ලිමේන්තුවේ නිලධාරීන් 4 දෙනකු ඇතුළත්ය.
මැයි 26 වැනිදා සිට 30 වැනිදා දක්වා පැවැත්වෙන මෙම වැඩසටහනට ව්‍යවස්ථාදායක සභාව සහ අයවැය ක්‍රියාවලීන්, පාර්ලිමේන්තු කමිටු පද්ධතීන් සහ ප්‍රජාතන්ත්‍රවාදී රටවල් දෙක අතර පවතින ගැටළු අනෙකුත් කරුණු ඇතුළත් වේ.
