ඉන්දියාවේ තෙලන්ගානා හි පැවති 72 වන ලෝක රූ රැජින උළෙලේදී “Multimedia Challenge” අංශයේ අවසන් තරගකරුවන් 20 දෙනා අතරට ශ්‍රී ලංකාවේ අනුදි ගුණසේකර පැමිණීමට සමත් වූවාය.
මෙය ශ්‍රී ලංකාවට හිමි වූ ඓතිහාසික ජයග්‍රහණයක් බව සඳහන් වේ. “Miss World” තරගයේ fast-track events අංශයෙන් තෝරා ගන්නා ඉහළම 20 දෙනා අතරට ශ්‍රී ලංකාව පැමිණි පළමු අවස්ථාව මෙය ලෙස සැලකේ.
Asia and Oceania කලාපයේ Multimedia Challenge අංශයේ අවසන් තරඟකරුවන් 5 දෙනා අතරට තේරීපත්ව සිටින්නේ නවසීලන්තය, පිලිපීනය, ශ්‍රී ලංකාව, තායිලන්තය සහ වියට්නාමය යන රටවල් නියෝජනය කළ තරගකාරිනියන්ය.
එසේම Americans and caribbean, Europe සහ Africa යන කළාප වලින්ද තරගකරුවන් 15 දෙනෙකු තේරී පත්ව තිබේ.
මෙම තරඟකරුවන් 20 දෙනා එක් අවසාන අභියෝගයකට මුහුණ දීමට නියමිතය.
එහිදී ඔවුන්ගේ ලෝක රූ රැජින ගමනේ සම්පූර්ණ කතාව විස්තර කරන වීඩියෝවක් නිර්මාණය කළ යුතු වේ.
එම වීඩියෝව මිනිත්තු 1 යි තත්පර 30 ක් විය යුතු බව සඳහන් වේ. එය මැයි 29 වන බ්‍රහස්පතින්දා පෙ.ව. 10:00 (ඉන්දියානු වේලාවෙන්) වන විට ලෝක රූ රැජින යෙදුමට යොමුකළ යුතුය.
ඒ අනුව, Multimedia Challenge අංශයේ අවසාන ප්‍රතිඵලය මෙම සිකුරාදා (30) ලබා දීමට නියමිතව ඇත. 2025 ලෝක රූ රැජින අවසන් මහා තරඟය මැයි 31 වන දින හයිද්‍රාබාද් ජාත්‍යන්තර ප්‍රදර්ශන මධ්‍යස්ථානයේදී පැවැත්වීමට නියමිතය.
