මත්තල රාජපක්ෂ ජාත්‍යන්තර ගුවන්තොටුපළ වසර 2කට ආසන්න කාලයකට පසු අද (දෙසැ. 29) සිට නැවතත් ජාත්‍යන්තර මෙහෙයුම් කටයුතු ආරම්භ කරන බව සිවිල් ගුවන් සේවා අධිකාරිය පවසයි.
මත්තල ගුවන්තොටුපළට කාල සටහනකට අනුව අවසන් වරට ගුවන් යානයක් පැමිණ තිබුණේ, 2021 වසරේදී ය.
ශ්‍රී ලංකාවේ දෙවන ජාත්‍යන්තර ගුවන් තොටුපළ ලෙස ඉදිකරන ලද මත්තල රාජපක්ෂ ගුවන්තොටුපළ පසුගිය කාලයේ හුදෙක් කටුනායක ජාත්‍යන්තර ගුවන්තොටුපළට විකල්ප ගුවන් තොටුපළක් ලෙස භාවිත කෙරිණි. එමෙන් ම, මෙරට ගුවන් සීමාවට ඉහළින් පියාසර කරන ගුවන් යානාවලට හදිසි ගොඩබෑම් සඳහා යොදාගත් ගුවන් තොටුපළක් ලෙස ද එය භාවිත කෙරිණි.
සිවිල් ගුවන් සේවා අධිකාරිය සඳහන් කළේ, අද (දෙසැ. 29) උදෑසන මගීන් 400කට වැඩි පිරිසක් රැගෙන Redwings ගුවන් සමාගමට අයත් බෝයිං 777-200 වර්ගයේ ගුවන් යානයක් රුසියාවේ සිට මත්තල ගුවන්තොටුපළට පැමිණීමට නියමිත බවයි.
ඒ අනුව, Redwings ගුවන් සමාගම 2023 වසරේ සිට සතියකට ගුවන් වාර 2ක් බැගින් ක්‍රියාත්මක කිරීමට නියමිතව ඇති අතර එය 3ක් දක්වා වර්ධනය කිරීමට නියමිත බව එම අධිකාරිය පැවසුවේ.
ඒ සඳහා විදේශ ගුවන් සමාගමකට දෙනු ලබන විදේශීය ගුවන් සමාගම් සඳහා වන මෙහෙයුම් බලපත්‍රය (Foreign Aircraft Operator Certificate) සිවිල් ගුවන් සේවා අධිකාරියේ අධ්‍යක්ෂ ජනරාල් හා ප්‍රධාන විධායක නිලධාරි පී.ඒ. ජයකාන්ත විසින් එම ගුවන් සමාගමේ දේශීය සම්බන්ධීකාරක ලෙස කටයුතු කරන LSR සමාගමේ සභාපති තිලක් වීරසිංහ වෙත ලබා දී තිබෙනවා.
“ගුවන් සේවා විෂය භාර ඇමතිතුමාගේ උපදෙස් මත මත්තල ගුවන්තොටුපළ වෙත තව තවත් ගුවන් යානා ගෙන්වීම සඳහා ජාත්‍යන්තර ගුවන් සමාගම් කිහිපයක් සමග මේ වන විට සාකච්ඡා කරමින් පවතිනවා. ලබන වසර තුළදී මත්තල ගුවන්තොටුපළ තුළ මෙහෙයුම් කටයුතු අඛණ්ඩව සිදු කිරීම සඳහා ගුවන් සේවා අමාත්‍යංශය හා සිවිල් ගුවන් සේවා අධිකාරිය කටයුතු කරමින් සිටිනවා.
පළමු ගුවන් යානය, රුසියාවේ සිට මගීන් 400කට වැඩි සංඛ්‍යාවක් රැගෙන අ උදෑසන මත්තලට පැමිණීමට නියමිත යි. මෙම ගුවන් සමාගමට සතිකයට ගුවන් ගමන් දෙකක් මෙහෙයුම් කටයුතු කිරීම සඳහා අනුමැතිය ලබා දී ඇති අතර තව තවත් ගුවන් යානා ගෙන්වීම සඳහා සකච්ඡා පවතිනවා. “මේ වන විට රුසියානු එයරොෆ්ලොට් සහ අසූර් යන ගුවන් සමාගම් කටුනායක බණ්ඩාරනායක ජාත්‍යන්තර ගුවන්තොටුපොළ වෙත ගුවන් ගමන් ක්‍රියාත්මක කරනු ලබනවා. ඒ වගේම, මේ වන විට මෙරටට පැමිණෙන විදේශීය සංචාරකයන්ගෙන් ඉහළ ම ප්‍රතිශතයක් පැමිණෙන බවට වාර් තා වන්නේ රුසියාවෙන්” එම අවස්ථාවේ අදහස් දැක්වූ අධ්‍යක්ෂ ජනරාල්වරයා ප්‍රකාශ කර තිබෙනවා.
