යුධමය තත්වය නිසාත්, දැඩි ශීත කාලගුණික තත්ත්වය නිසාත් පීඩාවට පත්වී සිටින යුක්රේන ජනතාව වෙනුවෙන් සහන සැපයීම සඳහා එක්සත් අරාබි එමීර් රාජ්‍යය විසින් බ්ලැන්කට් සහ පුද්ගලික සත්කාර සැපයුම් සහ LED බල්බ ඇතුළු ටොන් 14 ක සහනාධාර රැගත් ගුවන් යානයක් එහි යවා තිබෙනවා.
මෙම සැපයුම් අර්බුදය මධ්‍යයේ යුක්රේන ජනතාවගේ දුක් වේදනා සමනය කිරීම අරමුණු කරගත් එක්සත් අරාබි එමීර් රාජ්‍යයේ මානුෂීය ආධාරවල කොටසකි.
මෙම සහනාධාර මුලින්ම පෝලන්ත අගනුවර වන වෝර්සෝ වෙත ගුවන් මගින් ගෙන ගොස් පසුව යුක්රේනය වෙත යවනු ලැබේ.
අර්බුදය ආරම්භයේ සිටම, යුක්රේනයේ පීඩාවට පත් වූවන්ට එක්සත් අරාබි එමීර් රාජ්‍යය හදිසි සහන සැපයුම් ලබා දී ඇත. පසුගිය වසරේ ඔක්තෝබර් මාසයේදී යුක්රේන සිවිල් වැසියන්ට ඇමරිකානු ඩොලර් මිලියන 100 ක් ලබා දෙන බව නිවේදනය කරන ලදී. තවද, එක්සත් අරාබි එමීර් රාජ්‍යය විසින් ඩුබායි හි ජාත්‍යන්තර මානුෂීය නගරයේ සිට මූලික ආහාර සහ වෛද්‍ය ද්‍රව්‍ය සහිත ගුවන් යානා දෙකක් ඇතුළුව ආසන්න වශයෙන් ටොන් 550 ක සහන ද්‍රව්‍ය රැගෙන ගුවන් යානා 11 ක් මේ දක්වා යවා ඇත.
මීට අමතරව, පෝලන්තය, මෝල්ඩෝවා සහ බල්ගේරියාව වැනි අසල්වැසි රටවල සිටින යුක්රේන සරණාගතයින්ගේ භාවිතයට විදුලි උත්පාදක යන්ත්‍ර 2,520 ක් සහ ගිලන්රථ 6 ක් යුක්රේන බලධාරීන් වෙත ලබා දී තිබෙනවා.
