ඩුබායිහි තෙවසරකට පසුව පැවති “2023 සිඟිති අලුත් අවුරුදු මංගල්‍යය” විශාල ශ්‍රී ලාංකික ජන සහභාගීත්වයකින් යුතුව ඊයේ සවස ඩුබායි ශෙයිකා ලතීෆා රෝහල් ක්‍රීඩාංගණයේදී පැවැත්වුනා. මෙම සිඟිති අලුත් අවුරුදු මංගල්‍යය සංවිධාන කටයුතු සඳහා දහම් පාසල් දරු දැරියන්ගේ දෙමව්පියන්ගේ විශාල දායකත්වයක් ලැබුණා.
ශ්‍රී ලංකාවෙන් පිට ඩුබායි දේශයේ වාසය කරන දරුවන් වෙනුවෙන්ම පැවැත්වුන මෙම උත්සවයේ විශේෂත්වය වූයේ දැයේ දූ දරුවන්ට සිංහල හා දෙමළ අලුත් අවුරුදු උත්සවය හා බැඳුනු හෙල සිරිත් පිළිබඳව විනෝදාත්මකව අවභෝධයක් හා අත්දැකීම් සමුදායක් එක්කරලීමයි.
දහම්පාසල් දරුදැරියන් පමණක් සහභාගී වූ අවුරුදු ක්‍රීඩා ගනනාවක් පැවැත්වීමෙන් අනතුරුව දරුදැරියන් වෙනුවෙන් සංස්කෘතික අධ්‍යාපන වැඩසටහනක් සංවිධානය කොට තිබුණා.
එහිදී සියලුම දරුදැරියන් මෙත්තා / කරුණා / මුදිතා / උපේක්ඛා ලෙස නිවාස 4 කට බෙදා ඔවුන් සඳහා අවුරුදු සූදානම, කිරි ඉතිරවීම, ගනුදෙනු කිරීම, අවුරුදු චාරිත්‍ර වැනි දේ ඔස්සේ ඔවුනට ප්‍රායෝගික අත්දැකීම් ලබන්නට අවස්ථාව උදාකර දුන්නා.
ශ්‍රී ලංකාවෙන් බැහැරව වෙනස්වූ ජීවන රටාවක් තුල ජීවත්වන මෙම දරුවන් අසන්නට දකින්නට නොලැබෙන හෙල ජීවන රටාව හා බැඳුනු සිරිත් විරිත්, ආහාර, උපකරණ, ක්‍රමවේද, ඇඳුම් පැළඳුම් හා ක්‍රීඩා වැනි දේ පිළිබඳව ප්‍රායෝගික අත්දැකීම් ලබාදෙමින් ඔවුන් දැනුවත් කිරීමට මෙම වැඩසටහන බොහෝ ඉවහල් වුනා.
ඉන්පසුව හෙල නැටුම් ගැයුම් ඇතුලත් සංස්කෘතික උළෙල පවත්වනු ලැබුවා.
