මැලේසියානු රජය විසින් ශ්‍රී ලංකාව සඳහා ආරක්ෂක සේවා ක්ෂේත්‍රයේ රැකියා 10,000 ක අමතර කෝටාවක් වෙන් කර ඇති බව විදේශ රැකියා සහ කම්කරු අමාත්‍ය මනූෂ නානායක්කාර මහතා පවසයි.
2022 වර්ෂය තුළ විගමණික රැකියා ක්ෂේත්‍රයට අදාළව විදේශ රැකියාගත කිරීම්, පැමිණිලි, චෝදනා ඇතුළු සියලු කරුණු සලකා බලා, විදෙස් රැකියා ක්ෂේත්‍රයේ ජීවගුණය රැකගනිමින් සාධනීය කාර්යභාරයක් ඉටුකළ රැකියා නියෝජිත ආයතන ඇගැයීම පිණිස කොළඹ බණ්ඩාරණායක අනුස්මරණ ජාත්‍යන්තර සම්මන්ත්‍රණ ශාලාවේ දී පැවැති ‘Golden Award 2022’ සම්මාන ප්‍රදානෝත්සවයට එක්වෙමිනුයි ඔහු මේ බව කියා සිටියේ.
අමාත්‍ය මනූෂ නානායක්කාර මහතා පැවසුවේ, ශ්‍රී ලංකාවට දැනටමත් වෙන් කර ඇති රැකියා අවස්ථා 10,000 ක කෝටාවට අමතරව මෙම නව කෝටාව ලබාදෙන බවයි.
“මැලේසියානු රජයෙන් රැකියා අවස්ථා ලබා ගැනීමට අපට හැකි වී තිබෙනවා. මුලදී, රැකියා 10,000 ක කෝටාවක් මැලේසියානු කැබිනට් මණ්ඩලය විසින් අනුමත කර ඇති අතර, රැකියා 100,000 දක්වා වැඩි කිරීමේ හැකියාව පවතිනවා” ඔහු පැවසීය.
රාජ්‍යයන් දෙක අතර ගිවිසුම යටතේ නවතම රැකියා අවස්ථා සුරක්ෂිත කර ඇති බව අමාත්‍ය මනූෂ නානායක්කාර මහතා අනාවරණය කළේය.
“අපගේ ඉලක්කය වන්නේ විදේශ රැකියා හරහා ලැබෙන විදේශ ප්‍රේෂණ හරහා ඇමෙරිකානු ඩොලර් බිලියනයක් සුරක්ෂිත කර ගැනීමයි. මේ සඳහා වාර්තාගත සංක්‍රමණික ශ්‍රමිකයන් සංඛ්‍යාවක් පිටත්කර හැරීමට සිදුවනු ඇති අතර එය බඳවා ගැනීමේ ආයතනවල වගකීම වෙනවා. විදේශ රැකියා සඳහා යන අයගේ සුබසාධනය පිළිබඳ වගකීම රජය භාර ගන්නවා.”
විදේශ රැකියා පිළිබඳ නීති උල්ලංඝනය කිරීම්වලට සම්බන්ධ පුද්ගලයින් ඉවත් කරන අතරම ශ්‍රී ලාංකික සංක්‍රමණික ශ්‍රමිකයන්ගේ සුබසාධනය ඇතුළත් වන පරිදි විදේශ රැකියා පනත සංශෝධනය කර ඇති බවද අමාත්‍යවරයා වැඩිදුරටත්ස ඳහන් කළේය.
