ඊද් අල් අදා වෙනුවෙන් සිරකරුවන් 988 දෙනෙකු නිදහස් කිරීමට එක්සත් අරාබි එමීර් රාජ්‍යයේ ජනාධිපතිවරයා මීට පෙර නියෝග කොට තිබූ අතර එක්සත් අරාබි එමීර් රාජ්‍යයේ උප ජනාධිපති, අග්‍රාමාත්‍ය සහ ඩුබායි හි පාලක අතිගරු ෂෙයික් මොහොමඩ් බින් රෂීඩ් අල් මක්ටූම්, ඊද් අල් අදාට පෙර ඩුබායි හි විවිධ ජාතීන්ට අයත් සිරකරුවන් 650 දෙනෙකු නිදහස් කිරීමට නියෝග කොට තිබුණා.
ඒ සමගම සාජා හි උත්තරීතර කවුන්සිලයේ සාමාජික සහ සාජා පාලක අතිගරු ආචාර්ය සුල්තාන් බින් මොහොමඩ් අල් කාසිමි විසින් විවිධ නඩු සඳහා වරදකරුවන් වූ සාජා හි සිරකරුවන් 390 දෙනෙකු නිදහස් කිරීමට නියෝග කොට තිබෙනවා.
එක්සත් අරාබි එමීර් රාජ්‍යයේ විවිධ ප්‍රදේශවල පාලකයින් ආගමික හා විශේෂිත රාජ්‍ය උත්සව අවස්ථාවලදී සිරකඳවුරු වල විවිධ දඬුවම් ලබන රැඳවියන්ට සමාව ලබාදීම සාම්ප්‍රදායක්ව ඇති අතර මෙවර ඊද් අල් අදා උත්සවය නිමිත්තෙන්ද ඒ අනුව රැඳවියන්ට සමාව ලබාදීම සිදුවෙනවා.
අජ්මාන් හි උත්තරීතර කවුන්සිලයේ සාමාජික සහ අජ්මාන් පාලක අතිගරු ෂෙයික් හුමයිඩ් බින් රෂීඩ් අල් නුඅයිමි, ඊද් අල් අදා නිමිත්තෙන් අජ්මාන් හි සිරගතව සිටියදී යහපත් හැසිරීමක් පෙන්නුම් කළ සිරකරුවන් 166 දෙනෙකු නිදහස් කරන ලෙස නියෝග කර තිබෙනවා. මෙම පියවර සිරකරුවන්ට නව ජීවිතයක් ආරම්භ කිරීමට සහ ඔවුන්ගේ පවුල් මුහුණ දෙන දුෂ්කරතා ලිහිල් කිරීමට අවස්ථාවක් ලබා දීම අරමුණු කරගත් දයානුකම්පිතව සිදුකරන්නකි.
මීට සමගාමීව උත්තරීතර කවුන්සිලයේ සාමාජික සහ උම් අල් කුවේන් හි පාලක අතිගරු ෂෙයික් සවුද් බින් රෂීඩ් අල් මුවාල්ලා, ඊද් අල් අදා උත්සවය වෙනුවෙන් උම් අල් කුවේන්හි දණ්ඩනීය සහ නිවැරදි කිරීමේ ආයතනවල සිරකරුවන් ගණනාවකට සමාව ලබා දී ඇත.
උම් අල් කුවේන් හි පාලකයා සිරකරුවන්ට සිය සුබ පැතුම් ප්‍රකාශ කළ අතර ඔවුන් මෙම අවස්ථාව භාවිතා කර ධනාත්මකව සමාජයට ඒකාබද්ධ කිරීමට බලාපොරොත්තු වන බව පැවසීය.
