එක්සත් අරාබි එමීර් රාජ්‍යය පසුගියදා COP28 සමුළුවේදී නිවේදනය කලේ, 2050 වන විට කාර්මික කාබන් විමෝචනය ගිගා ටොන් 2.9 කින් 93% ක් දක්වා අඩු කිරීමේ අරමුණින් කාර්මික කාබන් අඩුකිරීමේ මාර්ග සිතියම දියත් කරන බවයි.
කර්මාන්ත හා උසස් තාක්ෂණ අමාත්‍යාංශය රජයේ සහ පෞද්ගලික අංශයේ උපායමාර්ගික හවුල්කරුවන් සමඟ එක්ව එම මාර්ග සිතියම ගොඩනඟා ඇත. එය එක්සත් අරාබි එමීර් රාජ්‍යයේ ශුද්ධ ශුන්‍ය 2050 උපායමාර්ගික මුලපිරීමට අනුකූල වන අතර පැරිස් දේශගුණ ගිවිසුම සහ දේශගුණික විපර්යාස පිළිබඳ එක්සත් ජාතීන්ගේ රාමු සම්මුතිය යටතේ සිදුකල යාවත්කාලීන කිරීම් වලට අනුකූලව නිර්මාණය කොට ඇත.
රාජ්‍ය අධ්‍යාපන සහ උසස් තාක්ෂණ රාජ්‍ය අමාත්‍ය සාරා බින්ට් යූසෙෆ් අල් අමිරි පැවසුවේ, “දශක තුනක් තිස්සේ එක්සත් අරාබි එමීර් රාජ්‍යය, එහි නායකත්වයේ දැක්ම යටතේ දේශගුණික ක්‍රියාකාරකම්වල ගෝලීය ප්‍රමුඛයා වී ඇත. එක්සත් අරාබි එමීර් රාජ්‍යය, පැරිස් ගිවිසුම අත්සන් කළ කලාපයේ ප්‍රථම රට වූ අතර, 2050 වන විට ශුද්ධ ශුන්‍ය ළඟා කර ගැනීමේ උපායමාර්ගික මුලපිරීමක් ප්‍රකාශයට පත් කළ පළමු රට විය. COP28 මගින් නියෝජනය කරන්නේ සියලු අංශවල ක්‍රමානුකූල බලශක්ති සංක්‍රාන්තියක් සාක්ෂාත් කර ගැනීම සඳහා අපගේ උත්සාහයේ අඛණ්ඩ පැවැත්මයි.”
ඇය තවදුරටත් මෙසේ පැවසුවාය: “මෙම මාර්ග සිතියම දියත් කරන ලද්දේ කාබන් විමෝචනය අවම කිරීම සඳහා එක්සත් අරාබි එමීර් රාජ්‍යයේ කැපවීම මෙන්ම තිරසාර කාර්මික සංවර්ධනය උත්තේජනය කිරීමේ අමාත්‍යාංශයේ උපාය මාර්ගයට අනුකූලවය. මෙම මුලපිරීම දියත් කිරීම අමාත්‍යාංශයේ සහ එහි උපායමාර්ගික හවුල්කරුවන්ගේ ඒකාබද්ධ උත්සාහයක ප්‍රතිඵලයකි. කාර්මික අංශය පිළිබඳ ජාතික අධ්‍යයනයක් සිදු කිරීමෙන් එය කළ හැකි විය. එය කර්මාන්තය හරහා දියුණු තාක්ෂණයන් සහ තිරසාර හොඳම භාවිතයන් යොදාගැනීම උත්තේජනය කිරීමේ ජාතික දැක්මක ප්‍රතිඵලයක් ද වේ.
අල් අමිරි තවදුරටත් මෙසේ පැවසීය: “ජාතික කර්මාන්ත අංශය හරහා 2050 වන විට 93% ක කාබන් අඩුකිරීමක් ක්‍රියාත්මක කිරීම සඳහා දියුණු තාක්‍ෂණය සංවර්ධනය කිරීම සහ අනුගමනය කිරීම කෙරෙහි මාර්ග සිතියමෙන් අවධානය යොමු කරයි. අධීක්‍ෂණය සහ අභියෝග ආමන්ත්‍රණය කිරීම මෙන්ම නවීන තාක්ෂණයන් දියුණු කිරීම සහ අනුගත කිරීම යන ක්‍රියාමාර්ග ගනනාවක් එයට ඇතුළත් වේ. එය ජාතික කාර්මික අංශයේ තරඟකාරිත්වය සහ සංවර්ධනය ප්‍රවර්ධනය කිරීම කෙරෙහි ද අවධානය යොමු කරයි.”
මාර්ග සිතියම අදියර තුනකින් සමන්විත වේ. පළමුවැන්න 2030 වන විට විමෝචනය 5% කින් අඩු කිරීමත්, දෙවැන්න 2040 වන විට 63% කින් අඩු කිරීමත් ඉලක්ක කරයි. තාක්‍ෂණයේ පරිමාණය සහ අඩුවන පිරිවැය හරහා, 2050 වන විට විමෝචනය අඩු කිරීම 93% දක්වා ළඟා වනු ඇතැයි අපේක්ෂා කෙරේ.
අමාත්‍යාංශය සහ එහි හවුල්කරුවන්, 50කට වැඩි ප්‍රමාණයක් දියුණු තාක්ෂණ සහ නව්‍ය විසඳුම්වල ශක්‍යතා පරීක්ෂා කර ඇගයීමට ලක් කර ඇත. පිරිසිදු විදුලිය, කාබන් ග්‍රහණය, භාවිතය සහ ගබඩා කිරීම (CCUS), නිෂ්පාදන කාර්යක්ෂමතාව, විකල්ප ඉන්ධන, ප්‍රතිචක්‍රීකරණය, ක්ලින්කර් ආදේශක සහ හයිඩ්‍රජන් ඊට ඇතුළත් වේ.
මාර්ග සිතියම තුළ, යකඩ, වානේ, ඇලුමිනියම්, සිමෙන්ති, සහ පෙට්‍රොරසායනික ද්‍රව්‍ය ඇතුළුව, විවිධ දුෂ්කර අංශ සඳහා වෙන් වෙන්ව කාබන් අඩු කිරීමේ කාලසීමාවන් ඇත. විවිධ කර්මාන්තවලට එරෙහිව විවිධ තාක්ෂණයන් සිතියම්ගත කර ඇත. එ්, එක් එක් විසඳුම එම විශේෂිත අංශයේ කාබන් අඩු කිරීමට කොපමණ දායක විය හැකිද යන්න මත පදනම්වයි.
