ප්‍රථම වතාවට අබුඩාබි සිට ඩුබායි වෙත පැය 24 පුරා ක්‍රියාත්මක බස් සේවාවක් COP28 හි නියෝජිතයින් සඳහා ක්‍රියාත්මක කොට තිබෙනවා. විදුලි බස් රථ නවයකින් සමන්විත ඇණිය සෑම දිනකම සංචාර 44 ක් පවත්වයි – අබුඩාබි ජාත්‍යන්තර ගුවන්තොටුපළේ A පර්යන්තයේ සිට ඩුබායි එක්ස්පෝ සිටිහි COP28 භූමිය දක්වා මගීන් ප්‍රවාහනය කරයි.
එහි හරිත බස් වැඩසටහන යටතේ අබුඩාබි මහ නගර සහ ප්‍රවාහන දෙපාර්තමේන්තුවේ ඒකාබද්ධ ප්‍රවාහන මධ්‍යස්ථානය (ITC) විසින් මෙම මුලපිරීම දියත් කර ඇත. ITC හි සැලසුම් දෙපාර්තමේන්තුවේ අධ්‍යක්ෂ, Ateeq Al Mazrouei පැවසුවේ, “මෙම සේවාවේ කැපී පෙනෙන දෙය නම් නගර දෙක අතර, දවසේ පැය 24 පුරාම ධාවනය වන නගරාන්තර බස් ප්‍රවාහනය සපයන පළමු අවස්ථාවයි.”
දිනකට කිලෝමීටර් 520 ක දුරක් ආවරණය කරන මෙම විදුලි බස් මෙහෙයුම් දිනකට කාබන් විමෝචනය ටොන් 3.7 කින් අඩු කිරීමට උපකාරී වේ.
දෙසැම්බර් 12 වැනිදායින් අවසන් වන COP28 සමුළුවෙන් පසු බස් රථ, අබුඩාබියේ පොදු ප්‍රවාහන ඇණියට ඒකාබද්ධ කෙරේ.
“අබුඩාබි හි හරිත බස් සේවා පුළුල් කිරීම අඛණ්ඩව සිදුවන බැවින් එය ක්‍රමයෙන් මගීන්ට හඳුන්වා දෙනු ඇත.”
ඒකාබද්ධ වූ පසු, ඇණිය දිනකට කිලෝමීටර් 3,150 ක් පමණ ආවරණය කිරීමට අපේක්ෂා කරන අතර වාර්ෂිකව කාබන් ඩයොක්සයිඩ් විමෝචනය ටොන් 900 කට වඩා අඩු කිරීමට දායක වේ. විදුලි බස් රථයක් ආරෝපණය කිරීමට ගත වන්නේ පැය දෙකක් පමණි.
මෙම මුලපිරීම පොදු ප්‍රවාහනයේදී පාරිසරික බලපෑම අවම කිරීම සහ අබුඩාබියේ පාරිසරික ආරක්ෂණ ප්‍රයත්නයන්ට සහාය වීම සඳහා වන ප්‍රධාන පියවරකි. එය පැමිණෙන්නේ පරිසර හිතකාමී ප්‍රවාහනය ප්‍රවර්ධනය කිරීමට සහ වැසියන්ගේ සහ සංචාරකයින්ගේ අවශ්‍යතා ඵලදායි ලෙස සපුරාලන සේවාවන් සැපයීමට අබුඩාබිහි කැපවීමේ කොටසක් වශයෙනි.
“2050 වන විට කාබන් විමෝචනය ශූන්‍ය දක්වා අඩු කිරීමට අබුඩාබි රජය විසින් සකස් කරන ලද උපාය මාර්ගය ක්‍රියාත්මක කරන පුළුල් ප්‍රවාහන පද්ධතියක් ස්ථාපිත කිරීමට මෙම මුලපිරීම කැපවී සිටී,” Al Mazrouei පැවසීය.
