සාජා වාණිජ හා කර්මාන්ත මණ්ඩලය (SCCI) විසින් සංවිධානය කරනු ලබන වාර්ෂික ප්‍රවර්ධන සහ විනෝදාස්වාද උත්සවය, Sharjah shopping festival 2023, දෙසැම්බර් 15 සිකුරාදා අද සිට සාජාහි ආරම්භකෙරේ. මෙවර උත්සවය “Smile for the Promotions, Smile for Shopping” යන තේමා පාඨය යටතේ දියත් කිරීමට නියමිතය.
සාජාහි බොහෝ සාප්පු සංකීර්ණ සහ සිල්ලර වෙළඳසැල් ක්‍රියාකාරකම් සඳහා සහභාගී වීමට නියමිත අතර එය 2024 ජනවාරි 20 දක්වා පැවැත්වේ.
සමාරම්භක සැණකෙළිය City Center Al Zahia හිදී ආරම්භ වන අතර, සාප්පු සංකීර්ණ අංශයේ ක්‍රියාකාරී කණ්ඩායම සමඟ සහයෝගයෙන්, සාජාහි රාජ්‍ය දෙපාර්තමේන්තු සහ නියෝජිතායතන කිහිපයක් සංවිධානය කෙරෙන අලෙවිකරණ ක්‍රියාකාරකම් සහ විනෝදාස්වාද වැඩසටහන් රාශියකින් Sharjah shopping festivalහි දියත් කිරීමට මෙවර පෙළගස්වා ඇත.
මීට අමතරව, මෙම උත්සවයේදී ජනප්‍රිය සන්නාම රාශියක නිෂ්පාදන භාණ්ඩ සඳහා ප්‍රවර්ධනයන් සහ ප්‍රධාන වට්ටම් ලබා දෙනු ඇත.
සාප්පු සවාරි, විනෝදාස්වාදය සහ විශාල ලාභ යන අත්‍යවශ්‍ය අංග තුනක් මත පදනම් වූ ක්‍රියාකාරකම් කිහිපයක් තුලින් සාජා හි සංචාරක සහ අලෙවිකරණ ආකර්ෂණය ඉහළ නැංවීම සාජා සාප්පු සවාරි ප්‍රවර්ධනයේ අරමුණයි.
මෙම උත්සවයේදී සාප්පු සවාරි යන්නන්ට විශාල වට්ටම් සමග වටිනා ත්‍යාග, සාජා පුරා ව්‍යාප්තව ඇති සාප්පු සංකීර්ණ, මධ්‍යම වෙලඳපොලවල් සහ සිල්ලර වෙළඳසැල් ඔස්සේ ලබාදෙනු ඇති අතර ඇඳුම් පැළඳුම්, සුවඳ විලවුන්, ඉලෙක්ට්‍රොනික උපකරණ, ගෘහ උපකරණ, මුළුතැන්ගෙයි උපකරණ සහ අනෙකුත් අයිතම සඳහා දැවැන්ත වට්ටම් පිරිනැමීමට ඔවුන් සූදානමින් සිටී.
මෙම වසරේ සාජා සාප්පු සවාරි ප්‍රවර්ධන මගින් සාජා වැසියන්ගේ සහ සංචාරකයන්ගේ සාප්පු සවාරි අත්දැකීම සාරවත් හා හරවත් කිරීම සඳහා සහරා මධ්‍යස්ථානය, සිටි සෙන්ටර් අල් සහියා සහ මෙගා මෝල් හි සාජා උරුමයන් සහ ජනප්‍රවාද අංගයන් උත්සවයට ඇතුළත් කොට තිබේ. Central Souk, Oasis Mall, සහ Al Majaz Amphitheater ළමුන් සහ පවුල් සඳහා පමණක් නිර්මාණය කර ඇති විශේෂ ක්‍රියාකාරකම් මාලාවක් ද පවත්වනු ලබයි.
