එක්සත් අරාබි එමීර් රාජ්‍යය, රටේ රාජ්‍ය අංශයේ සහ පෞද්ගලික අංශයේ සේවකයින් සඳහා නිවාඩු දිනයක් ප්‍රකාශයට පත් කොට තිබෙනවා.
2024 ජනවාරි 1 වන සඳුදා, අලුත් අවුරුදු දිනයේ පෞද්ගලික අංශයේ සේවකයින් සඳහා නිල වැටුප් සහිත නිවාඩු දිනයක් වන බව මානව සම්පත් සහ එමරාතීකරණ අමාත්‍යාංශය (MoHRE) නිවේදනය කර තිබෙනවා.
මෙම තීරණය, 2024 සඳහා රාජ්‍ය අංශයේ සහ පෞද්ගලික අංශයේ අනුමත නිවාඩු දින සම්බන්ධ කැබිනට් මණ්ඩලයේ යෝජනාව සමග සමපාත වේ.
ෆෙඩරල් රාජ්‍ය ආයතන සඳහා ජනවාරි 1 වන සඳුදා අලුත් අවුරුදු දිනය නිවාඩු දිනයක් ලෙස රජයේ මානව සම්පත් සඳහා වන ෆෙඩරල් අධිකාරිය (FAHR) විසින්ද නිවේදනයක් නිකුත් කොට තිබෙනවා.
දෙසැම්බර් 30 සහ 31 යන දින දෙක සතිඅන්තයේ දින දෙකක් බැවින් ජනවාරි පළමුවෙනි සඳුදා නිවාඩු දිනයත් සමග රාජ්‍ය සහ පෞද්ගලික දෙඅංශයේම සේවකයන්ට අලුත් අවුරුද්ද සඳහා දින තුනක නිවාඩුවක් ලැබෙනු ඇති.
රජයේ මානව සම්පත් සඳහා වන ෆෙඩරල් අධිකාරිය (FAHR) විසින් පසුගියදා නිකුත් කරන ලද චක්‍රලේඛයක් සඳහන් කළේ ජනවාරි දෙවන අඟහරුවාදා නැවත වැඩ ආරම්භ කරන බවයි.
