ජනාධිපති රනිල් වික්‍රමසිංහ මහතාගේ සංකල්පයෙන් මාර්තු මස 4 වැනිදා ආරම්භ කරන ලද ගාසා හි ළමා අරමුදලට ශ්‍රී ලාංකික පරිත්‍යාගශීලීන් සහ විවිධ ආයතනවලින් මේ වන විට රුපියල් මිලියන 127ක (කෝටි 12.7ක) මුදලක් පරිත්‍යාග ලෙස හිමිව ඇත.
ගාසා තීරයේ පවත්නා යුදමය තත්ත්වය හේතුවෙන් එම ප්‍රදේශයේ සිරවී සිටින මිලියනයකට ආසන්න ළමයින්ගේ අසරණ තත්ත්වය මත විශේෂයෙන් ජලය, ආහාර හා වෛද්‍ය පහසුකම්වල හිඟය නිසා ඔවුන්ට මුහුණ දීමට සිදුව ඇති විවිධ දුෂ්කරතා සැලකිල්ලට ගෙන එම අත්‍යවශ්‍ය වියදම් පියවා ගැනීමට මූල්‍යාධාර ලබාදීම වෙනුවෙන් මෙම අරමුදල පිහිටුවනු ලැබීය. ඒ සඳහා අමාත්‍ය මණ්ඩලයේ අනුමැතිය ද හිමිව තිබිණි.
ඒ අනුව ගාසා තීරයේ ළමයින්ගේ සහන කටයුතු සඳහා අරමුදලක් පිහිටුවීම වෙනුවෙන් පසුගිය ඉෆ්තාර් උත්සවය සැමරීම සඳහා ජනාධිපති කාර්යාලය, අග්‍රාමාත්‍ය කාර්යාලය ඇතුළු රාජ්‍ය ආයතන මඟින් වෙන්කර තිබූ රුපියල් මිලියනයක මුදලක් පළමු අදියර යටතේ ඉකුත් අප්‍රේල් 01 වැනි දින එක්සත් ජාතීන්ගේ සහන සහ වැඩ නියෝජිතායතනය (UNRWA) හරහා පලස්තීන රජය වෙත භාර දෙනු ලැබීය. ගාසා තීරයේ විවිධ අපහසුතාවන්ට ලක්ව සිටින ළමයින්ගේ මූලික අවශ්‍යතා සඳහා වියදම් දැරීම පිණිස එම අරමුදල් ද ඉදිරියේදී එක්සත් ජාතීන්ගේ සහන සහ වැඩ නියෝජිතායතනය වෙත ලබාදීමට නියමිත බව වාර්තා වේ.
ශ්‍රී ලංකා රජය මඟින් ලබාදෙනු ලැබූ එම ප්‍රදානයට අමතරව ගාසාහි ළමා අරමුදලට දායක වන ලෙස ජනාධිපති රනිල් වික්‍රමසිංහ මහතා විසින් ව්‍යාපාරික ආයතන, විවිධ සංවිධාන හා පොදු මහජනතාවගෙන් කරන ලද ඉල්ලීම අනුව ශ්‍රී ලාංකික පරිත්‍යාගශීලීන් හා විවිධ ආයතන මේ සමඟ අත්වැල් බැඳගෙන ඇත. මෙම අරමුදලට ආධාර සපයමින් මේ දක්වා ඒ සමඟ අත්වැල් බැඳගත් සියලු දෙනා වෙත ජනාධිපතිවරයාගේ සහ ජනාධිපති කාර්යාලයේ ස්තූතිය පළ කරන බව මේ සම්බන්ධයෙන් නිවේදනයක් නිකුත් කරමින් ජනාධිපති කාර්යාලය සඳහන් කරයි.
එසේම විවිධ පාර්ශ්වයන් වෙතින් ලැබුණු ඉල්ලීම් සලකා මෙම කාර්යය සඳහා මහජනතාවගේ සහ විවිධ සංවිධානවලින් මැයි 31 වැනිදා දක්වා ප්‍රදානයන් භාර ගැනීමට කටයුතු කරනු ලබන අතර ඒ අනුව ඉහත මුදලට අමතරව එදින දක්වා ලැබෙන මුදල් ද එක්කර සියලු පරිත්‍යාගයන් කඩිනමින් එක්සත් ජාතීන්ගේ සහන සහ වැඩ නියෝජිතායතනය වෙත ලබාදීමට කටයුතු කරන බව ජනාධිපති කාර්යාලය වැඩිදුරටත් දන්වා සිටී.
