ආසියානු තරගාවලියට දකුණු ආසියානු කලාපයේ සුදුස්සන් තෝරා ගැනීම සඳහා දකුණු ආසියානු මේස පන්දු සම්මේලනයේ අධීක්ෂණය යටතේ ශ්‍රී ලංකා මේස පන්දු සංගමය සංවිධානය කළ තරගාවලියේදී පදක්කම් 12ක් දිනා ගැනීමට ශ්‍රී ලංකා ක්‍රීඩක ක්‍රීඩිකාවෝ සමත් වූහ.
ඊයේ (29) මහනුවරදී පැවති මෙම තරගාවලියේදී ශ්‍රී ලංකාවට රන් පදක්කමක්, රිදී පදක්කම් 5ක් සහ ලෝකඩ පදක්කම් 6ක් හිමි විය.
මේ තරගාවලියේදී රන් පදක්කම් 14ක් පිරිනැමූ අතර ඉන් පදක්කම් 13ක්ම ඉන්දියාව සතු විය.
ශ්‍රී ලංකාවට හිමි වූ එකම රන් පදක්කම අවුරුදු 19න් පහළ ක්‍රීඩකයෝ කණ්ඩායම් ඉසව්වේ දිනාගත් අතර, ලීග් ක්‍රමයට පැවැති මේ ඉසව්වේදී ශ්‍රී ලංකා පිල සහභාගිවූ තරග 4ම ජය ගැනීමට සමත් විය. එම කණ්ඩායමට ෂෆියුල්ලා අක්‍රම්, ජනිත් බටුගෙදර, ඩිරාන් හාමර් සහ සාලුක ප්‍රේමචන්ද්‍ර ඇතුළත් වූහ. අවුරුදු 19න් පහළ කණ්ඩායමක් මේ ඉසව්වෙන් රන් පදක්කම් දිනා ගත්තේ වසර 10කට පසුව වීම කැපී පෙනිණි.
තරගාවලියේ කැපී පෙනෙන ශ්‍රී ලංකා ක්‍රීඩිකාව වූ මහනුවර මහාමායා විදුහලේ යෝෂිනි ජයවර්ධන රිදී පදක්කම් 3ක් සහ ලෝකඩ පදක්කමක් දිනා ගැනීමට දායකත්වය දුන්නාය.
අවුරුදු 15න් පහළ බාලිකා යුගල සහ මිශ්‍ර යුගල ඉසව්වලින් රිදී පදක්කම් දිනාගත් ශ්‍රී ලංකාවට අවුරුදු 19න් පහළ බාලිකා සමඟ අවුරුදු 15න් පහළ බාලක බාලිකා කණ්ඩායම් ඉසව්වලින් ද රිදී පදක්කම් හිමි විය.
එහිදී මිතුලි සමඟ එක්ව බාලිකා යුගල රිදී පදක්කම දිනාගත් යෝෂිනි ජයවර්ධන අකේන් සමඟින් එක්ව මිශ්‍ර යුගල රිදී පදක්කම දිනා ගත්හ. මීට අමතරව ඇය 15න් පහළ බාලිකා රිදී පදක්කම දිනාගත් කණ්ඩායමේ සාමාජිකාවක් ද වූවාය.
ශ්‍රී ලංකාවට හිමි වූ පදක්කම් මෙසේය:
රන් පදක්කම් – 19න් පහළ බාලක කණ්ඩායම් ඉසව්ව
රිදී පදක්කම – 19න් පහළ බාලිකා කණ්ඩායම්, 15න් පහළ බාලක කණ්ඩායම්, 15න් පහළ බාලිකා කණ්ඩායම්, 15න් පහළ බාලිකා යුගල, 15න් පහළ මිශ්‍ර යුගල
ලෝකඩ පදක්කම් – 19න් පහළ බාලිකා යුගල, 19න් පහළ බාලක යුගල, 19න් පහළ මිශ්‍ර යුගල, 15න් පහළ බාලක යුගල, 19න් පහළ බාලිකා කේවල, 15න් පහළ බාලිකා කේවල.
