ණය ප්‍රතිව්‍යුහගතකරණ ක්‍රියාවලියේ අවසන් අදියරට ළඟා වෙමින් සිටින අතර එය දෙසැම්බර් 31 වන විට අවසන් කිරීමට උත්සාහ කරන බව ආර්ථික කටයුතු නියෝජ්‍ය අමාත්‍ය සහ කම්කරු අමාත්‍ය මහාචාර්ය අනිල් ජයන්ත ප්‍රනාන්දු මහතා පාර්ලිමේන්තුවේදී ඊයේ (05) පැවසීය.
ණය ප්‍රතිව්‍යුහගතකරණ ක්‍රියාවලිය ප්‍රමාද වීමෙන් පමණක් අමතර හිඟ පොලිය වශයෙන් ඩොලර් බිලියන 1.7ක් ගෙවීමට සිදු වන බව ද ඇමැතිවරයා පැවසුවේය.
අතුරු සම්මත ගිණුමට අදාළ යෝජනා සම්මතය පිළිබඳ විවාදය ආරම්භ කරමින් අමාත්‍යවරයා මේ බව කියා සිටියේය. ඇමැතිවරයා මෙසේ ද පැවසුවේය.
විසර්ජන කෙටුම්පතක් සම්මත නොවන තත්ත්වයකදී ඊළඟ මුදල් වර්ෂයේ පළමු මාස 4 සඳහා රාජ්‍ය සේවාවන් හා පවත්වාගෙන පැමිණි සංවර්ධන කටයුතු සඳහා මුදල් වෙන් කිරීම අතුරු සම්මත ගිණුම මඟින් වෙන් කරනවා. 2025 වසරේදී සංවර්ධන ව්‍යාපෘති ක්‍රියාවට නංවන්නේ කුමන ආකාරයකින් ද යන කාරණාව 2025 වසරේ විසර්ජන පනත් කෙටුම්පතට ඇතුළත් කරනවා. අතුරු සම්මත ගිණුමෙන් අපි ඉදිරිපත් කරන වියදම් පිළිබඳ කාරණා 2025 විසර්ජන පනත් කෙටුම්පතට සම්බන්ධ කර ඉදිරිපත් කරනවා. ඒ අනුව ඉදිරිපත් කර තිබෙන අතුරු සම්මත ගිණුමෙන් පළමු මාස 4 සඳහා පුනරාවර්තන වියදම් පොලී හැර රුපියල් බිලියන 1000කුත් ප්‍රාග්ධන වියදම් සඳහා රුපියල් බිලියන 425කුත් ණය ප්‍රතිව්‍යුහගතකරණයට අමතරව දේශීය අනෙකුත් ණය සේවා රුපියල් බිලියන 1175කුත් අවශ්‍ය වෙනවා. ඒ අනුව මුළු ඇස්තමේන්තුව රුපියල් බිලියන 2600ක්. ඒ අනුව ආණ්ඩුවේ ආදායම් ඇස්තමේන්තුව රුපියල් බිලියන 1600යි.
ජාතික ජන බලවේගයට ලැබුණු ජනවරම අනුව රට ගොඩ යන කාරණා ගැන ක්ෂේත්‍ර ගණනාවක් ඔස්සේ ඉදිරිපත් කර තිබෙනවා.
රට තුළ ඩිජිටල්කරණය ඉහළ තත්ත්වයක් කරා නැංවිය යුතුයි. වැවිලි කර්මාන්ත ක්ෂේත්‍රයේ වැටුප් වැඩි කළත් ඔවුන්ගේ එදිනෙදා ජීවිතය නිසි ලෙස ගත කළ නොහැකියි. රට තුළ සාමය ස්ථාපිත කිරීමත් ආර්ථික ක්‍රියාවලියට දායක වෙනවා. ආර්ථික ක්‍රියාවලිය ඉදිරියට ගෙන යෑම සඳහා ආයෝජන කැඳවිය යුතුයි. ඍජු ආයෝජන වැදගත්. ව්‍යාපාරිකයන්ට සැකයකින් තොරව ව්‍යාපාර කිරීම සඳහා පසුබිම විවෘත කළ යුතුයි. පොලී අනුපාතයේ ස්ථාවර වීමක් සිදුව තිබෙනවා. 2024 වසරේ ආර්ථික වර්ධනය වූයේ සියයට 2.2යි. ජනාධිපතිවරණයෙන් පසුව අපි ක්‍රමිකව ආර්ථික වර්ධනයක් කරා යමින් සිටිනවා.
ආර්ථිකය අතින් ලෝකය තුළ සිදු කරන ශ්‍රේණිගත කිරීම්වලදී ඉදිරි වර්ෂ තුළදී ඉදිරියට රට ගෙන යා හැකියි කියා මා විශ්වාස කරනවා. ජාතික ජන බලවේගය කටයුතු කරනුයේ සමූහයක් විදිහට. ඒ සඳහා මූලික අඩිතාලම අපි දාලා අවසන්. පොහොසත් රටක් ලස්සන ජීවිතයක් තේමාව යටතේ රට දියුණු වන ආකාරය 2025 අය-වැයෙන් ජනතාවට තේරුම් ගත හැකියි. රටක් ගොඩ යන විට ජාත්‍යන්තර සංවිධානවල සහාය ලැබෙනවා. එය දැනට අපේ රටට සිදුවෙමින් තිබෙනවා. විපක්ෂයේ අයටත් අපි යෝජනා කරන්නේ එකට එක්ව ඉදිරියට යමු කියලා. ලෝකය තාක්ෂණය මඟින් බොහෝ ඉදිරියට ගොස් තිබෙනවා. ඒ තත්ත්වයට අපේ රටත් තාක්ෂණය අතින් ඉදිරියට යා යුතුයි.
