වයස අවුරුදු දෙකට අඩු දරුවන්, දුර්වල ප්‍රතිශක්තිකරණ පද්ධතියක් පවතින්නන් සහ වැඩිහිටියන් සහ පිළිකා රෝගීන් ‘එච්. එම්. පී. වී. (හියුමන් මෙටා නියුමෝනියා) වෛරසයට ගොදුරුවීමේ වැඩි අවදානමක් පවතින බව, ශ්‍රී ජයවර්ධනපුර විශ්වවිද්‍යාලයේ අසාත්මිකතා, ප්‍රතිශක්තිවේදී සහ සෛල ජෛව විද්‍යා් අංශයේ අධ්‍යක්‍ෂ මහාචාර්ය චන්දිම ජීවන්දර මහතා ප්‍රකාශ කළේය.
මෙම වෛරසය සාමාන්‍යයෙන් සතියක් තුළ පහව යන බවත්, මේ සඳහා නිශ්චිත ප්‍රති වෛරස් ප්‍රතිකාරයක් හෝ එන්නතක් දැනට නොමැති බවත් මහාචාර්යවරයා සඳහන් කළේය.
එච්. එම්. පී. වී. වෛරසය යනු ශ්වසන පද්ධතියේ ඉහළ ආසාදනයට තුඩුදෙන වෛරසයක් බවත්, බොහෝ ආසාදිතයන්ට කැස්ස, උණ සහ නාසයේ තදබදයක් ඇතිවීම මෙහි මූලික රෝග ලක්‍ෂණ බවත් ඔහු පැවසීය. සබන් යොදා දෑත් සේදීම, ශ්වසන වෛරස් ආසාදනවලින් වඩාත් දරුණු රෝගාබාධවලට ගොදුරුවීමේ වැඩි අවදානමක් තිබේ නම් හැකිතාක් මහජනයා අතර ගැවසීමෙන් වැළකී සිටීම මෙන්ම මුව ආවරණයක් පැලඳීම මෙම වෛරසයෙන් ආරක්‍ෂා වීමට ගතහැකි පියවර වේ.
එච්. එම්. පී. වී. වෛරසය කොවිඩ් – 19 මෙන් නොවන බවත්, මෙම වෛරසය දශක ගණනාවක් පැවතිය හැකි බවත්, මෙම වෛරසය සෑම දරුවකුගේම පස්වන උපන් දිනය වන විට ආසාදනයවීමේ හැකියාවක් පවතින බවත් මහාචාර්යවරයා අවධාරණය කළේය.
මෙම වෛරසය ආසාදිත වූවන් 2023 වසරේ සිට මෙරට සිටින බවට සොයාගෙන ඇති බැවින් ඒ පිළිබඳව අනිසි බියක් ඇතිකර ගත යුතු නැතැයි ද මහාචාර්ය චන්දිම ජීවන්දර මහතා වැඩිදුරටත් සඳහන් කළේය.
