අමෙරිකානු ජනාධිපති ඩොනල්ඩ් ට්‍රම්ප් ශ්‍රී ලංකාවෙන් ආනයනය කරන භාණ්ඩ සඳහා 44% ක තීරු බද්දක් පැනවීමට තීරණය කර ඇත.
අදාළ බදු පැනවීම අමෙරිකානු ජනාධිපතිවරයා විසින් ඊයේ (02) ප්‍රකාශයට පත්කර ඇති අතර සෙනසුරාදා (05) දිනයේ සිට එම බදු පැනවීම ක්‍රියාත්මක වේ.
අමෙරිකානු ජනාධිපතිවරයා රටවල් කිහිපයකට තීරුබදු පැනවීම ඊයේ දිනයේ සජීවීව ප්‍රකාශයට පත් කළේය. මෙහිදී ලොව පුරා රටවල් 60කට වැඩි ප්‍රමාණයක් සඳහා නව තීරු බදු ලැයිස්තුවක් එළිදක්වා ඇති බව සඳහන් වේ.
අමෙරිකාවේ වෙළෙඳ අසමතුලිතතාවය පාලනය කිරීම සහ අමෙරිකානු කර්මාන්ත ධෛර්යමත් කිරීමේ අරමුණින් මෙම නව බදු පැනවීමේ අරමුණ බව අමෙරිකානු ජනාධිපතිවරයා ප්‍රකාශ කර ඇත.
නව බදු ප්‍රතිපත්තියට අනුව සියලුම ආනයනය කිරීම් සඳහා10% ක තීරු බද්දක් ඇතුළත් වන අතර අමෙරිකාව සමග වෙළෙඳ අතිරික්තයක් පවත්වාගෙන යන රටවල් සඳහා ඉහළ තීරු බද්දක් ප්‍රකාශයට පත්කර තිබේ.
ඒ අනුව ශ්‍රී ලංකාවට සියයට 44ක තීරු බදු පැනවීමක් සිදුකර ඇති අතර එය ලොව වැඩිම තීරුබදු පැනවූ පළමු රටවල් පහ අතරට ඇතුළත්ව තිබීම විශේෂත්වයකි.
කාම්බෝජනයට 49% ක තීරු බද්දක්ද, වියට්නාමයට 46% ක තීරුබද්දක්ද පනවා ඇත.
බංග්ලාදේශයට 37%, තායිලන්තයට 36%, චීනයට 34% ක්, ඉන්දියාවට 26% ක බදු පැනවීමක් සිදුකර ඇති අතර යුරෝපීය සංගමයට 20% ක තීරු බදු පැනවීමක් සිදුකර ඇති බව සඳහන් වේ.
මෙතෙක් අමෙරිකාව විසින් ශ්‍රී ලංකාවෙන් ආනයනය කරන භාණ්ඩ සඳහා 12.2% ක තීරුබදු පැනවීමක් සිදුකර තිබිණි.
