බ්‍රිතාන්‍ය රූ රැජන මිලා මැගී ලෝක රූ රැජන තරගයේ අවසන් වට කිහිපය අතරතුර තරගයෙන් ඉවත්වූයේ සංවිධායකයන්ගේ සූරා කෑමට එරෙහිව බව බ්‍රිතාන්‍යයේ ‘සන්‘ පුවත් සේවය වාර්තා කළේය.
ඉන්දියාවේ තෙලංගනා ප්‍රාන්තයේ හයිද්‍රබාද් නුවර කේන්ද්‍ර කරමින් පැවැත්වෙන 72 වැනි ලෝක රූ රැජන තරගයෙන් ඉවත්වී නැවත බ්‍රිතාන්‍යයට පැමිණීමෙන් පසු පැවැති සම්මුඛ සාකච්ඡාවේදී ඇය එසේ කී බව ද සන් පුවත් සේවය වැඩිදුරටත් වාර්තා කළේය. තමා ඇතුළු තරගකාරිනියන් සංවිධායකයන්ගේ සූරාකෑමට ලක්වන බවත්, 70 දශකයේ තරම් පැරැණි යල්පිනූ ආකාරයේ රූ රැජන තරග අද කාලයට ගැළපෙන්නේ නැති බවත් 24 හැවිරිදි මිලා මැගී සම්මුඛ සාකච්ඡාවේදී ප්‍රකාශ කළ බව ද සන් පුවත් සේවය සඳහන් කරයි.
ධනවත් පිරිමි අනුග්‍රාහකයන් මානසිකව සන්තර්පණය කිරිමට අපට සිදුවුණා. එය මට දැනුණේ අප ගණිකාවන් බවට පත් කරන ආකාරයකුයි. ‘රටවල් 109ක රූ රැජනන් තරග වදින මෙවර ලෝක රූ රැජන තරගයෙන් ඉවත්වූ මිලා එසේ සඳහන් කර තිබේ. රූ රැජනන් යනු ලෝකය වෙනස් කිරිමට සිය හඬ සහ රූපය භාවිත කරන පිරිසක් බවත්, රූ රැජනන් දෙදෙනකු බැගින් අමුත්තන් 6 දෙනකු අසුන්ගෙන සිටින මේසයකට ගොස් ඔවුන් හා කතාබහ කිරීම වැනි විමතිය දනවනසුලු ආකාරයේ අත්දැකීම්වලට මුහුණ පෑමට සිදුවූ බව සඳහන් කර ඇති මිලා මැගී තමා රූ රැජන තරගයට සහභාගි වූයේ අමුත්තන් පිනවීමට නොවන බව අවධාරණය කර ඇතැයි ද වාර්තා වේ.
