ඩුබායි පොලිසියට අයත් Lost and Found දෙපාර්තමේන්තුව විසින් මීට වසරකට පෙර ඩුබායි සංචාරයකදී නැති වූ කිර්ගිස්තාන ජාතික සංචාරක කාන්තාවකට අයත් ඩිරාම් 110,000 ක් වටිනා ඔරලෝසුවක් ආපසු ලබා දී තිබෙනවා.
සිය ගුවන් යානය අල්ලා ගැනීමට ඩුබායි ජාත්‍යන්තර ගුවන් තොටුපළ වෙත පිටත්ව යන විට එම කාන්තාවට හෝටල් කාමරයේදී ඇගේ ඔරලෝසුව අමතක වී ඇති බව අපරාධ පරීක්ෂණ දෙපාර්තමේන්තුව පවසනවා.
ඇය ආපසු සිය රටට පිටත්ව ගොස් ඇති අතර එහිදී ඇය රථවාහන අනතුරකට ලක්ව තිබෙනවා. ඇයගේ ඔරලෝසුව අතුරුදහන් වී ඇති බව ඇයට වැටහුණේ එවිටය. සිද්ධිය අතරතුර එය කොහේදී හෝ නැතිවන්නට ඇතැයි උපකල්පනය කළ ඇය ඩුබායි පොලිසියට පැමිණිල්ලක් ගොනු කර තිබුනේද නැත.
අපරාධ පරීක්ෂණ දෙපාර්තමේන්තුවේ සාමාන්‍ය අධ්‍යක්ෂ මේජර් ජෙනරාල් ජමාල් සලීම් අල් ජලාෆ් පැවසුවේ කිර්ගිස් සංචාරකයෙකු තම වටිනා ඔරලෝසුව අතහැර ගොස් ඇති බවට හෝටලයෙන් වාර්තාවක් දෙපාර්තමේන්තුවට ලැබී තිබුණ බවයි.
“හෝටල් ලියාපදිංචියේදී ලබා දී ඇති දුරකථන අංකය සංචාරක ඒජන්සියක බැවින් අපට වහාම හිමිකරු වෙත සම්බන්ධ වීමට නොහැකි විය. වැඩිදුර විමර්ශනය සමඟ, අපි ඇයගේ සම්බන්ධතා තොරතුරු ලබා ගත් අතර වහාම ඇයගේ දුරකථන අංකය සහ සමාජ මාධ්‍ය ගිණුම හරහා ඇයව සම්බන්ධ කර ගැනීමට උත්සාහ කළෙමු. එයින්ද ඵලයක් ලැබුනේ නැහැ” ඔහු වැඩිදුරටත් පැවසීය.
වසරක් ගෙවී ගිය අතර කිර්ගිස් කාන්තාව මෑතකදී එක්සත් අරාබි එමීර් රාජ්‍යයට නැවත පැමිණි අතර අපරාධ විමර්ශන දෙපාර්තමේන්තුව විසින් දිගු කලක් තිස්සේ නැතිව තිබූ ඔරලෝසුව ආපසු ඇයට ලබා දුන් විට ඇය පුදුමයට පත් වී ඇත. සංචාරක කාන්තාව මේ සම්භන්ධයෙන් පොලිසියට සිය කෘතඥතාව පළ කොට තිබෙනවා.
