තුර්කියට බලපෑ ප්‍රබල භූමිකම්පාවෙන් දරුණුතම හානියට පත් ප්‍රදේශයක් වන Gaziantep හි Islahiye දිස්ත්‍රික්කයේ එක්සත් අරාබි එමීර් රාජ්‍යයේ ‘Gallant Knight / 2’ මෙහෙයුමේ සෙවීම් සහ මුදාගැනීමේ කණ්ඩායම් විසින් ජංගම රෝහලක් විවෘත කිරීමට අවශ්‍ය කටයුතු සම්පාදනය කරමින් පවතිනවා.
එහි පළමු අදියරේදී, රෝහල මගින් ආපදාවෙන් පීඩාවට පත් වූවන්ට රෝග විනිශ්චය සේවා සහ වෛද්‍ය ප්‍රතිකාර ලබා දෙනු ඇත. එහි හදිසි අනතුරු අංශ, මෙහෙයුම් කාමර, දැඩි සත්කාර ඒකක, CT ස්කෑන්, සහ විෂබීජහරණ පහසුකම් වලින් සමන්විත වෙනවා.
එහි දෙවන අදියරේදී රෝහල රසායනාගාරයක්, එක්ස් කිරණ පහසුකම්, ෆාමසියක්, දන්ත වෛද්‍ය අංශයක්, බාහිර රෝගී සායන, ඇඳන් 50ක ධාරිතාවයකින් යුත් නේවාසික ප්‍රතිකාර වාට්ටු ඇතුළත් වන පරිදි සිය සේවාවන් පුළුල් කරනු ඇත.
විවිධ විශේෂඥ වෛද්‍යවරුන් 15 දෙනෙකුගෙන් යුත් කණ්ඩායමක්, හෙදියන් 60 දෙනෙකු සහ වෛද්‍ය උපකරණ කාර්මික ශිල්පීන් විසින් රෝහලේ මෙහෙයුම් අධීක්ෂණය කරනු ලබන අතර එමරාති සෞඛ්‍ය සේවා වෘත්තිකයන් වෛද්‍ය සහාය ලබා දෙනු ඇත.
මෙම රෝහල තුර්කියට සහ සිරියාවට ව්‍යසනය ඇති වූ වහාම එක්සත් අරාබි එමීර් රාජ්‍යය විසින් ක්‍රියාත්මක කරන ලද සහනසේවා වැඩසටහනට ඇතුලත් වෙනවා.
මේ වන විට ආධාර රැගත් ගුවන් යානා 27ක් දෙරටට යවා ඇති අතර, තවත් ජීවිත බේරා ගැනීමේ අපේක්ෂාවෙන් සෝදිසි කිරීම් සහ ගලවා ගැනීමේ කණ්ඩායම් පැය විසිහතර පුරා වැඩ කරමින් සිටිති. පැය 120කට ආසන්න කාලයක් සුන්බුන් යට සිරවී සිටි 11 හැවිරිදි දරුවෙකු සහ වයෝවෘද්ධ පුද්ගලයෙකු ඊයේ රාත්‍රියේ කාර්ය මණ්ඩලය විසින් බේරාගෙන තිබෙනවා.
එක්සත් අරාබි එමීර් රාජ්‍යයේ, ස්වේච්ඡා සේවකයන්, මානුෂීය සංවිධාන සහ රාජ්‍ය ආයතන සහන බලමුලු ගැන්වීම සඳහා එක්වෙමින් සිටිති. එමිරේට්ස් රෙඩ් ක්‍රෙසන්ට් විසින් ‘Bridges of Good’ ප්‍රචාරණ ව්‍යාපාරයක් මෙහෙයවන අතර, එමගින් නිවැසියන්ට උපකාර පිරිනැමිය හැකිය.
